Amérika awam palatasi aqsarayning agahlandurushigha qarimay, tor bixeterlik qanuni maqullidi

Amérika awam palatasi peyshenbe küni aqsarayning agahlandurushigha qarimay, tor bixeterlik qanuni maqullidi.
Muxbirimiz erkin
2012.04.27

Mezkur qanun layihiside karxanilar bilen bixeterlik organlirining öz-ara tor buzarlirigha da'ir uchur almashturushigha yol qoyulghan. Biraq shirketler bilen bixeterlik organlirining tor abontlirining shexsi uchurini öz-ara almashturushigha yol qoyulghan mezkur qanun'gha amérika xelq hoquqi teshkilatliri qarshi chiqqan.

Ular tor abontlirining shexsi uchurini bixeterlik organliri bilen almashturush kishilik hoquqqa dexli-teruz yetküzüshidin endishe qilidighanliqini bildürgen.
Mezkur qanun layihisi awam palatasining 248 ezasining qollishi, 168 ezasining qarshi turushi bilen maqullan'ghan.

Mezkur qanun layihisini otturigha qoyghan awam palata istixbarat komitétining jumhuriyetchi we démokratchi ezaliri shu küni bayanat élan qilip, mezkur qanun her ikki partiye mensupliri teripidin birdek qollashqa érishkenlikini maxtighan shundaqla uning “Amérika shirketlirini xeterlik iqtisadi küshendilerdin téximu yaxshi qoghdaydighanliqi” ni bildürgen.

Biraq aqsaray, mezkur qanun layihiside “Tor abontlirining xususi turmushi, shexsi mexpiyetliki, kishilik erkinliki yéterlik kapaletke ige qilinmighanliqi” ni ilgiri sürüp, mezkur qanun layihisige qarshi chiqqan idi. Aqsaray charshenbe küni élan qilghan bayanatida awam palatasini agahlandurup, mezkur qanun maqullansa, prézidéntning imza qoyushni ret qilidighanliqidin bésharet bergen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.