Австралийә хитайниң австралийидики бир төмүр руда кениға мәбләғ селишини тости

Австралийә хитайниң вухән полат - төмүр ширкитиниң австралийидики бир төмүр руда кениға мәбләғ селиш пиланини австралийиниң дөләт бихәтәрлик мәсилисигә четилидиғанлиқи сәвәби билән тосқанлиқини елан қилди.
Мухбиримиз әркин
2009.09.24

Австралийә мәтбуатлириниң хәвәр қилишичә, хитайниң вухән полат төмүр ширкити австралийә ғәрбий түзләңлик кан байлиқлар ширкитиниң җәнубий австралийидики вумера районида ачқан бир төмүр руда кениниң 50% пай чекини сетивалмақчи болған. Лекин, австралийә һөкүмити хитайниң вумера вадисидики төмүр руда кениға игә болушини тосуп, бу сода австралийиниң дөләт бихәтәрлик мәсилисигә четилидиғанлиқи, чүнки төмүр руда кени вумера чәкләнгән райониға җайлашқанлиқини, бу районда австралийә армийисиниң мәхпий қоралларни синайдиған тәҗрибә базиси барлиқини билдүргән.

Австралийә дөләт мудапиә министири җон фоулкнер, пәйшәнбә күни австралийә мәтбуатлириға бәргән бу һәқтики баянатида австралийә дөләт мудапиә министирликиниң вухән полат төмүр ширкитиниң һәрбий база районидики төмүр руда кениниң 50 % пай чекини сетивелишини рәт қилиш һоқуқи барлиқини әскәртип, төмүр руда кени қорал ярақ синақ қилидиған даиридики назук район һесаблинидиғанлиқини илгири сүргән.

Бу вәқә икки дөләт мунасивити йеқинда хитайниң австралийә рио тенто кан ширкити мәсуллирини қолға елиш шундақла уйғур рәһбири рабийә қадир ханимниң австралийини зиярәт қилиши қатарлиқ сәвәбләр түпәйлидин йирикләшкән мәзгилидә йүз бәргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.