Австралийә хитайдин америка билән һәрбий һәмкарлиқ елип бериш һоқуқиға һөрмәт қилишни тәләп қилди

Австралийә ташқи ишлар министири баб кар чаршәнбә күни ахбарат васитилиригә сөһбәт елан қилип, австралийиниң америка билән һәрбий һәмкарлиқ елип бериш һоқуқи барлиқи вә хитайдин австралийиниң бу җәһәттики игилик һоқуқиға һөрмәт қилишни тәләп қилған.
Мухбиримиз әркин
2012.08.23
Share on WhatsApp
Share on WhatsApp

Австралийә билән америка өткән йили келишим түзүп, америкиниң 2500 кишилик деңиз пиядиләр қисмини австралийиниң шималидики дарвин портиға орунлаштурушқа келишкән. Бирақ бу келишим җәнубий деңиздики аралларниң игилик һоқуқини талишиватқан хитайни қаттиқ биарам қилған.

Баб кар “австралийә малийә көзитиш” гезитигә австралийә-америка арисидики келишимниң хитайға қаритилмиғанлиқини билдүрүп: хитай австралийиниң өз мудапиә сияситигә асасән америка билән иттипақдашлиқ мунасивити қуруш һоқуқи барлиқини етирап қилиши керәк, дегән.

Америка-австралийә арисидики келишим бойичә америка деңиз пиядә қисимлири бу йил 4‏-айдин башлап дарвин портиға келип орунлишишқа башлиған. Хитай америка қисимлириниң бу районға орунлишишини “соғуқ мунасивәтләр дәвридики пикир қилиш усули”ниң мәһсули, дәп тәнқид қилған иди. Лекин баб кар, австралийә америка билән хитай арисидики таллаш обйекти болуп қалса, болмайдиғанлиқини билдүргән.

Баб кар бу сөзләрни қилған вақитниң өзидә австралийә дөләт мудапиә министири стефан симис, австралийә алдинқи сәптики уруш айропиланлириға америкиниң әң илғар типлиқ електронлуқ кашила пәйда қилиш әсваби орунлаштурулидиғанлиқини елан қилған. Америкиниң бу хил електронлуқ кашила пәйда қилиш әсваблири ш а о т ниң өткән йили ливийидики һава һәрикитигә қатнашқан уруш айропиланлириға орунлаштурулуп, казафийниң алақә вә башқурулидиған бомба системисини паләч әһвалға чүшүрүп қойған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.