Awstraliye xitaydin amérika bilen herbiy hemkarliq élip bérish hoquqigha hörmet qilishni telep qildi

Awstraliye bilen amérika ötken yili kélishim tüzüp, amérikining 2500 kishilik déngiz piyadiler qismini awstraliyining shimalidiki darwin portigha orunlashturushqa kélishken. Biraq bu kélishim jenubiy déngizdiki arallarning igilik hoquqini talishiwatqan xitayni qattiq bi'aram qilghan.

Bab kar “Awstraliye maliye közitish” gézitige awstraliye-amérika arisidiki kélishimning xitaygha qaritilmighanliqini bildürüp: xitay awstraliyining öz mudapi'e siyasitige asasen amérika bilen ittipaqdashliq munasiwiti qurush hoquqi barliqini étirap qilishi kérek, dégen.

Amérika-awstraliye arisidiki kélishim boyiche amérika déngiz piyade qisimliri bu yil 4‏-aydin bashlap darwin portigha kélip orunlishishqa bashlighan. Xitay amérika qisimlirining bu rayon'gha orunlishishini “Soghuq munasiwetler dewridiki pikir qilish usuli”ning mehsuli, dep tenqid qilghan idi. Lékin bab kar, awstraliye amérika bilen xitay arisidiki tallash obyékti bolup qalsa, bolmaydighanliqini bildürgen.

Bab kar bu sözlerni qilghan waqitning özide awstraliye dölet mudapi'e ministiri stéfan simis, awstraliye aldinqi septiki urush ayropilanlirigha amérikining eng ilghar tipliq éléktronluq kashila peyda qilish eswabi orunlashturulidighanliq'ini élan qilghan. Amérikining bu xil éléktronluq kashila peyda qilish eswabliri sh a o t ning ötken yili liwiyidiki hawa herikitige qatnashqan urush ayropilanlirigha orunlashturulup, kazafiyning alaqe we bashqurulidighan bomba sistémisini palech ehwalgha chüshürüp qoyghan idi.