B d t bash katipi ban kimun insan heqliri mesiliside özini aqlidi

Dunya kishilik hoquqni közitish teshkilati düshenbe küni élan qilghan yilliq doklatida, b d t bash katipi ban kimunni, insan heqliri mesiliside ching turmidi dep tenqid qilghan idi. Bügün bash katip ban kimunning bayanatchisi bu heqte söz qilip, ban kimunning insan heqliri mesiliside xizmet uslubining bashqiche ikenlikini, yeni di'alog we hemkarliqni asasi wasite qilghanliqini bildürgen.

Muxbirimiz shöhret hoshur
2011-01-25

Insan heqliri pa'aliyetchiliri ban kimunning uslubini tolimu yumshaq we heddidin ziyade éhtiyatchan dep tenqid qilmaqta. Ban kimunning bayanatchisi "emeliy netijiler ban kimunning uslubining ünümlük ikenlikini körsetti" dégen.

Dunya kishilik hoquqni közitish teshkilatining doklatida, ban kimunning özbékistan we türkmenistan qatarliq döletlerni ziyaret qilghanda insan heqliri mesilisini nisbeten qattiq tekitlep, xitaygha oxshash chong insan heqliri paji'eliri dawam qiliwatqan döletlerni ziyaret qilghanda awazining peslep ketkenlikini, hetta chiqmay qalghanliqini bildürgen.

Ban kimunning 5 yilliq wezipe mudditi mushu yil 12 ‏-ayning 31 ‏-küni axirlishidu, shunga bezi közetküchiler, ban kimunning ikkinchi qétim yene wezipige olturush temeside ikenlikini, wezipige olturushta xitayning qollishigha érishish üchün, ötken yili xu jintaw bilen körüshkende insan heqliri mesilisini tilgha almighanliqini otturigha qoyghan idi.