Barak obama qesem bérip, 2‏-nöwet prézidéntliq wezipisini tapshuruwaldi

Bu obamaning mushu ikki küni ichide 2‏-qétim qesem bérishi. Amérika qanuni boyiche prézidént choqum 20‏-yanwar qesem bérip wezipige olturushi kérek. Biraq resmiy qesem bérish murasimi 21‏-yanwar martén lutir king xatire künige orunlashturulghachqa, obama yekshenbe küni aq sarayda xanimi mishél obama, ikki qizining guwahliqi we amérika bash sotchisi jon robértsning riyasetchilikide qesem bergen.

Lékin u texminen 700‏-800 ming adem qatnashqan 21‏-yanwar düshenbe künidiki murasimda yene bir qétim qesem berdi. Obama murasimda sözligen nutqida amérika xelqini birlik, barawerlikke chaqirip, ajizlar, kembegheller, salametlik sughurtisi yoqlar we oxshash jinsliqlarning hoquqini qoghdaydighanliqi, balilarni qoralliq zorawanliqtin saqlaydighanliqini bildürdi.

Özining kelgüsi 4 yilda yürgüzidighan siyasitini sherhlep: biz asiyadin afriqighiche, amérika qit'eliridin ottura sherqqiche bolghan rayonlarda démokratiyini qollaymiz. Chünki menpe'itimiz we wijdaniy mejburiyitimiz bizni erkinlik üchün izden'güchilerni qollashqa dewet qilidu, dédi.

Murasimda kelliy klasén, jéymis teylor, byanséy qatarliq ataqliq cholpanlar naxsha éytti. Byanséy amérika dölet marshini orunlidi.

Qesem bérish murasimidiki nutqida musapining toluq tamamlanmighanliqini tekitligen obama: bu bir ewlad amérikiliqlar krizislar arqiliq sinaldi. Bu bizning iradimizni téximu mustehkemlidi hem özimizge kélish qabiliyitimizni ispatlidi. 10 Yil dawam qilghan urush axirlashmaqta. Iqtisad eslige kélishke bashlidi. Amérika cheksiz imkaniyetlerge ige, dep körsetti.

Prézidént obamaning 2009‏-yilidiki 1‏-nöwet prézidéntliq wezipisini tapshuruwélish murasimigha texminen bir milyon 800 ming adem qatnashqan. Da'iriler bu qétimqi murasimgha texminen 800-700 ming adem qatnashqanliqini bildürgen.

42-Nöwetlik prézidént jorj bushning 2005‏-yildiki 2‏-nöwetlik qesem bérish murasimigha texminen 260 mingdin 280 mingghiche adem qatnashqan idi.