Бейҗиңда ечилған йиғинда уйғур райониға “ихтисаслиқ хадим” йөткәш тәкитләнди

Йиғинға бейҗиң шәһәрлик парткомниң секретари лю чи вә уйғур районлуқ партком секретари җаң чүншйәнләр қатнашқан болуп, лю чи сөзидә уйғур райониниң һалқима тәрәққиятини илгири сүрүш үчүн хитай өлкилиридин көплигән вә һәр саһә “ихтисаслиқ хадим” лириниң уйғур райониға әвәтилишиниң интайин муһим әһмийәткә игә икәнликини тәкитлигән.

У һәрсаһә ихтисаслиқ хадимлирини хотән вилайитигә мәслиһәтчиликкә тәклип қилиш керәк, дәп көрсәткән.

Хитай даирилири йеқиндин буян уйғур елидә һалқима тәрәққиятни қолға кәлтүрүш үчүн “ихтисаслиқ хадим” тәклип қилиш һәрикити елип бериватқан иди. Әмма чәтәлләрдики көзәткүчиләр буниң хитайниң уйғур райониға хитай көчмини йөткишиниң йәнә бир хил васитиси икәнликини илгири сүрмәктә.

Хәвәрдин мәлум болушичә йәнә, уйғур райониниң баш секретари җаң чүншән йиғинда алди билән бейҗиңниң уйғур райониға қиливатқан “халсиәнә” ярдимигә тәшәккүр ейтқандин кейин “уйғур районида алий мәктәп пүттүргән яшларни ичкиридики мәктәпләрдә тәрбийиләш хизмити вә шинҗаңлиқ сәргәрдан балиларни панаһландуруш хизмитини яхши ишләш уйғур райониниң муқимлиқи вә һалқима тәрәққияти үчүн муһим әһмийәткә игә” дегән.

Униң сөзидин мәлум болушичә, бундин кейин бейҗиңда ишләватқан шинҗаңлиқ ишләмчиләр вә тиҗарәтчиләрни башқуруш хизмитини икки тәрәп бирлишип туруп ишләйдиған болуп, көзәткүчиләр, буниң хитайниң ичкиридики уйғурларни тәқиб қелишни күчәйтидиғанлиқидин дерәк беридиғанлиқини билдүрмәктә.