Нобел мукапати комитети хитай даирилириниң намзатлар мәсилисидә өзлирини агаһландурғанлиқини ашкарилиған

Лундестәд әпәнди бүгүн бирләшмә агентлиққа бу һәқтә бәргән мәлуматқа қариғанда, хитай муавин ташқи ишлар министири фу йиңниң, нобел комитетини бу йиллиқ нобел тинчлиқ мукапатини хитай өктичи затлиридин лю шавбоға бәрмәслик һәққидә агаһландурған. Билдүрүлүшичә, фуйиң йәнә, әгәр нобел мукапати лю шавбоға берилип қалса, буниң норвегийә билән хитай арисидики достанә мунасивәткә тәсир йәткүзүдиғанлиқини билдүргән.

Ләндестәд әпәнди мухбирға қилған сөзидә, нобел комитетиниң норвегийә һөкүмити билән алақиси болмиған мустәқил тәшкилат икәнликини, шуңа бәргән агаһландурушларниң комитет қарариға тәсир көрситәлмәйдиғанлиқини билдүргән вә буниңға далай ламаниң тинчлиқ мукапатиға еришкәнлигини пакит сүпитидә баян қилған.

Мәлум болушичә, бу йилқи нобел намзатлири арисида мәшһур хитай өктичи затлиридин лю шавбому бар болуп, у, 2008 ‏- йили "дөләт һакимийитини ағдурушқа урунуш җинайити" билән әйиблинип 11 йиллиқ кесилгән. У, нөвәттә хитайда җаза муддитини өтимәктә.

Лю шявбо, 2008 ‏- йили хитайни демократийиләштүрүшкә чақирип елан қилинған 2008" хитабнамиси" ниң лайиһилигүчилири вә имза топлашни тәшкиллигүчиләрдин бири иди. Әслидә университетта профессор болған лю шявбо, 1989 ‏- йилидики "тйәнәнмен оқуғучилар вәқәси" дин кейинму җазалинип, 2 йил түрмидә ятқан.