Xitaydin bu yil 12 ming 700 kishi hejige baridiken

Xitay da'iriliri bu yil haji namzatlirining hemmisige choshqa zukamigha qarshi waksina emleydighanliqini, hazirghiche ningshiyaliq 2 mingdin artuq haji namzatlirigha waksina emlen'genlikini bayan qildi. Emma shinxu'a agéntliqining xewiride bu yil hejige baridighan namzatlarning qaysi milletlerdin terkip tapqanliqi we ularning sani éniq tilgha élinmighan.

Radi'omizgha kelgen uchurlardin melum bolushiche, xitay hökümiti hazir Uyghurlarning hej tawap ishlirini qattiq qéyinlashturuwatqan bolup, ular tarqaq hej qilishni pütünley cheklesh üchün birinchisi kent komitéti ötkili, ikkinchisi yéza ‏- bazarliq saqchixanilarning siyasiy jehettin tekshürüsh ötkili, üchinchisi yéza ‏- bazar rehberliri testiqlash ötkilidin ibaret "üch ötkel" ni ching tutush boyiche ish körüwatqan, Uyghurlar bu ötkellerdin ming bir musheqqette ötüp pasportini alghan teqdirdimu, hökümet teshkilligen hej ömeklirige tizimlash heqqi hemde töleydighan hej rasxoti 30 ming yüendin éship kétidighan bolghachqa, tügimes qiyin resmiyetler hem yuqiri hej rasxoti tüpeyli Uyghur élidiki köpinchisi déhqan bolghan musulmanlar buninggha chiqish qilalmaydiken.

Uyghurlarning inkasigha qarighanda, Uyghur élidiki hökümet orunliri 2009 - yilliq hej ishlirigha tizimlitish heqiqi üchünla 15 ming yu'en telep qilghan iken.

Xitay da'irilirining bulturqi ürümchi ayrodromi hem her qaysi chégra éghizliridiki tarqaq hejning aldini élish herikiti alte aydin uzun dawam qilghan idi.