Nobél komitétining katipi bu yilliq nobél tinchliq mukapati murasimining tarixtiki eng muhim murasim bolup qalidighanliqini bildürdi
Muxbirimiz erkin
2010.11.11
2010.11.11
Lundistad fransiye axbarat agéntliqigha, 2010 - yilliq nobél tinchliq mukapati mukapat sahibining yaki uning wekilining murasimgha qatniship, mukapatni tapshurup alalmasliqi sewebidin mushu 100 yilliq tarixta yüz bergen alahide ehwaldur.
Bu ehwalni béyjing da'irilirining muresseleshmeslik pozitsiyisi keltürüp chiqardi dégen. U yene, bu nobél komitétining mushu 100 yilliq tarixtin buyan chiqarghan eng muhim qararlirining biri bolup qélishi mumkinlikini bildürgen.
Gerche, xitay hökümiti nobél komitétining qararini shiddetlik tenqid qilghan bolsimu, lékin lundistad nobél komitéti qararini aqlap, mezkur komitétning en'eniside öktichi zatlarni mukapatlash qa'idisi barliqini we bu yilliq mukapatning lyu shawbogha bérilishining bu en'enige pütünley uyghun kélidighanliqini ilgiri sürgen.
Nobél komitéti burun natséstlar gérmaniyisi we sabiq sowét ittipaqidiki öktichi zatlarni mukapatlighan bolup, nobél komitéti eyni chaghda oxshashla natséstlar gérmaniyisi we sowét ittipaqining tenqidi hem tehditige uchrighan, lékin bu nobél komitétini özining qararidin yanduralmighan idi.
Bu qétim nobél komitéti lyu shawboni mukapatlap, xitay hökümitining tehditige we agahlandurushigha uchrighan. Lundistad nobél komitétining natséstlar gérmaniyisi, sowét ittipaqi, jenubiy afriqa, bérma, iran qatarliq döletlerning bésimigha bash egmigenlikini eskertip, xitaygha bu döletlerdin bashqichirek mu'amile qilmaydighanliqini bildürgen.
Xitay hökümiti yawropa elliri we yaponiye qatarliq döletlerdin murasimni bayqut qilishni telep qilghan idi. Lékin, bu döletler xitayning telipini ret qilip, murasimgha adettikidek qatnishidighanliqini bildürgen. Nöwette mukapatni lyu shawbogha wakaliten kimning tapshurup alidighanliqi hazirghiche éniq emes.
Xitay da'iriliri lyu shawboning ayalini nezerbend qilghan bolup, bezi analizchilarning ilgiri sürüshiche, da'iriler lyu shawboning ikki inisiningmu chet'elge chiqishini cheklishi mumkin.