بۇنىڭدىن ئۈچ كۈن بۇرۇن، بۈگۈر بازىرى، يېڭىسار رايونى قاتارلىق جايلاردا 5.4 بال يەر تەۋرەش يۈز بەرگەن، شۇ چاغدا 600 كىلومېتىر يىراقلىقتىكى ئۈرۈمچىدىمۇ كىشىلەر سىلكىنىش ھېس قىلغان ئىدى. بۈگۈردە بۇ قېتىم يەر تەۋرەش ئاپىتىگە ئۇچرىغان ئادەم سانى 40 مىڭدىن ئاشتى. ئۆرۈلگەن ئۆي سانى 2 مىڭ 400 دىن ئاشتى. دەرھال قۇتقۇزۇشقا تېگىشلىك ئادەم سانى 8 مىڭدىن ئاشتى.
خەۋەردە ئېيتىلىشىچە، خىتاينىڭ يېڭى چېگرا دائىرىلىرى بۈگۈردە يۈز بەرگەن بۇ قېتىمقى يەر تەۋرەشكە قارىتا 4-دەرىجىلىك قۇتقۇزۇش تەدبىرى قوللىنىپ، ئاپەت يۈز بەرگەن رايونلارغا چېدىر، پاختىلىق كىيىم، يېمەك ئەۋەتىشكە باشلىغان.