Rus axbarati chéchen pida'iylarning wiladimir putin'gha suyiqest pilanlighanliqini ashkarilidi
2012.02.27
Rusiyining qanal 1 téléwiziyisining bu heqtiki xewiride bildürüshiche, mezkur pilanni ijra qilmaqchi bolghanlar jem'iy 3 kishi bolup, bulardin ikki nepiri chéchen, bir nepiri qazaqistanliq. Xewerdin melum bolushiche, bu üch kishi putinning öyi bilen xizmet sariyi arisidiki musapide putin olturghan aptomobilni bir qanche qétim süretke alghan. Ular putinni mana mushu resimge élin'ghan jayda partlitip öltürüshni pilanlighan.
Xewerde yene bayan qilinishiche, mezkur pida'iylardin ikkisi mushu ayning béshida, dubey we türkiye arqiliq ukra'iniyige kelgen. Ular ukra'iniyidiki bir öyde partlatquch bomba teyyarlawatqanda, tuyuqsiz bomba partlap kétip, ukra'iniye saqchiliri teripidin yaridar halette tutqun qilin'ghan we délosi éniqlan'ghandin kéyin rusiyige ötküzüp bérilgen.
Ular soraq jeryanida özlirining putinni partlitip öltürüshni pilanlighanliqini we özlirining chéchen pida'iylarning meshhur yétekchisi doku ömerofning qomandanliqida ikenlikini bayan qilghan. Xewerde qazaqistanliq pida'iyning ismi Ilya Pyanzin dep yézilghan, emma étnik teweliki bayan qilinmighan.