Chégrisiz muxbirlar teshkilati ochuq xet élan qilip, xitay xelq qurultiyidin asasi kishilik hoquqni muzakire qilishni telep qildi

Chégrisiz muxbirlar teshkilati jüme küni ochuq xet élan qilip, xitay xelq qurultiyining béyjingda bashlan'ghan memliketlik wekiller yighinidin asasi kishilik hoquqni muzakire qilishni telep qildi.
Muxbirimiz erkin
2011.03.04

Ochuq xette, 3000 kishilik xelq qurultiyi wekillirini xitayni téximu keng échiwétishke, ereb elliride partlighan xelq isyanidin ibret élishqa we xelqning démokratik hoquqigha hörmet qilishqa chaqirdi. Chégrisiz muxbirlar teshkilati yene, xitay hökümitining 2010-yilliq nobél tinchliq mukapatigha érishken xitay öktichisi lyu shawboni qoyup bérip, özining bu jehettiki yaxshi niyitini ipadilishini, iz-déreksiz yoqap kétish weqelirige xatime bérip, qolgha élin'ghanlarni qoyup bérishni telep qildi.

Ochuq xette yene, xitay da'iriliri kishilik hoquq pa'aliyetchilirining iz-déreksiz yoqap kétishide türlük wasitilerni qolliniwatqanliqini eskertip, ular bir tereptin öktichilerni türmidin qoyup bergenlikini élan qilsa, yene bir tereptin ularni üzlüksiz tutup turuwatqanliqini, ularning a'ile tawabatlirini bashqa bir jayda nezerbend qiliwatqanliqini tekitligen.

Chégrisiz muxbirlar teshkilatining ilgiri sürüshiche, xitay hökümiti lyu shawboning ayali lyu shya, mongghul öktichi xada, kishilik hoquq pa'aliyetchisi chén gu'angching, mongghul yazghuchi xu chinxu qatarliq kishilerge yuqiriqi taktikilarni qollan'ghan.

Ochuq xette yene, xitay hökümitining yéqindin béri yolgha qoyghan axbarat cheklimisini tenqid qilip, xitay da'irilirining shimaliy afriqa we ottura sherqtiki xelq isyanlirining xitaygha tutushup kétishidin ensirewatqanliqini, söz erkinliki hem muxbirlarning kespi erkinlikige da'ir mesililerge pewqul'adde sezgür mu'amile qiliwatqanliqini tenqidligen.

Chégrisiz muxbirlar teshkilatining ilgiri sürüshiche, xitayning nöwettiki axbarat cheklimisi 2008‏-yili yüz bergen tibet isyani, 2009‏-yili yüz bergen ürümchi“5-Iyul weqesi ”din kéyin, axbarat hoquqigha qilin'ghan ighwagerchilikning 3‏-basquchidur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.