Чеграсиз мухбирлар тәшкилати хитайниң ахбарат әркинлик әһвалида илгириләш болмиғанлиқини билдүрди

Чеграсиз мухбирлар тәшкилати чаршәнбә күни 2012‏-йиллиқ доклат елан қилип, бу йил мухбирларниң хизмәт сәвәблик өлүш әһвали 33 % артқанлиқи, бирақ қолға елинған мухбирлар сани 16 азайғанлиқини билдүрди.
Мухбиримиз әркин
2012.12.19

Доклатта илгири сүрүшичә, бу йил хитайниң ахбарат әркинлик әһвалида һечқандақ илгириләш болмиған.

Доклатта, хитай даирилириниң 30 нәпәр мухбир вә 69 нәпәр тордашни түрмидә тутуп туруватқанлиқи әскәртилип, түрмидики мухбир вә тордашларниң сани изчиллиқни сақлап келиватқанлиқи, уларниң мутләқ көп қисми ағдурмичилиқ, дөләт мәхпийәтликини ашкарилаш дегәндәк җинайәтләр билән әйиблинип, узун муддәтлик қамақ җазасиға һөкүм қилинғанлиқини билдүргән.

Чеграсиз мухбирлар тәшкилати илгири хитай даирилириниң мәхбубә абләш, мәмәтҗан абдулла, ғәйрәт нияз қатарлиқ уйғур журналистларни узун муддәтлик қамақ җазасиға һөкүм қилғанлиқини тәнқид қилип, уларни қоюп беришни тәләп қилған. Бирақ хитай һөкүмити уларниң чақириқини изчил рәт қилип кәлгән иди.

Доклатта илгири сүрүлүшичә, бу йил хитай сиясий сақчилири һәрикитини нуқтилиқ сөз әркинлик паалийәтчилириниң вә микро блог актиплириниң паалийитини тәқиб қилишқа қаратқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.