Ema pa'aliyetchi chén gu'angchéngning jyenige bérilgen 3 yilliq qamaq jazasi diqqet qozghidi

Hökümde uning jinayiti saqchilarning wezipe ijra qilishigha tosqunluq qilish dep békitilgen we uning qoligha pichaq élip saqchilarni öyidin qoghlap chiqirishi jinayi pakit qilip körsitilgen. Chén kéguy, amérika diplomatiye küchige tayinip turup xitaydin qutuldurup chiqqan ema kishilik hoquq pa'aliyetchisi chén gu'angchéngning jyeni bolghachqa, uning üstige mezkur sotning jeryani mewhum bolghachqa, chén kéguygha bérilgen jaza xelq'ara jama'etning diqqitini qozghidi.

Köpinche közetküchiler, mezkur jazani xitay hökümitining chén gu'angchéngdin öch élishi dep qarimaqta. Bügün chén gu'angchéng roytirésning bu heqtiki ziyaritini qobul qilip, sotning mezkur hökümining adil bolmighanliqini otturigha qoydi. U sözide jyenining saqchilarni pichaq bilen öyidin qoghlishini yolluq halda özini qoghdash dep aqlidi.

Melum bolushiche, chén gu'angchéng roytirésning ziyaritini qobul qilghanda, eyni chaghda anisining neq meydanni teswirlep bergen widi'o körünüshini muxbirgha qoyup bergen. Körünüshte bayan qilinishiche, chén gu'angchéng öyidin qachqandin bir kün kéyin, yérim kéchide saqchilar uning öyige basturup kirgen we chén gu'angchéngning jyenini kaltek bilen urup akisining iz-dérikini sorighan, bu chaghda u ashxana öydin pichaq kötürüp chiqip saqchilarni öyidin qoghlap chiqarghan.