Далай лама мәсилиси һиндистан билән хитай арисида йәнә талаш тартиш қозғиди

Йеқинда хитай һиндистанни далай ламаға паалийәт соруни һазирлап бериш билән әйибләп, хитай-һиндистан чегра сөһбитини бикар қилғандин кейин, бу қетим далай ламаниң калкуттада елип барған паалийити хитай-һиндистан арисида йәнә талаш-тартиш қозғиди.
Мухбиримиз әркин
2011-12-02
Share

Һиндистан ахбарат васитилириниң хәвәр қилишичә, хитайниң калкуттадики консулханиси йеқинда һиндистан ғәрбий бенгал штатиниң һөкүмәт баш катипи сре самар гош әпәндигә хәт йезип, ғәрбий бенгал штатиниң һөкүмәт башлиқи вә баш валисиниң далай лама нутуқ сөзләйдиған паалийәткә қатнашмаслиқини тәләп қилған.

Хитай әлчиханисиниң хетидә, әгәр штат баш валиси вә һөкүмәт башлиқи далай ламаниң паалийитигә қатнашса, җуңго тәрәп буни далай ламаниң “җуңгоға қарши мәйдани” ни қоллиғанлиқ, дәп қарайдиғанлиқини илгири сүргән.

Бирақ хитай консулханисиниң мәзкур хети бәзи һиндистан ахбарат васитилириниң тәнқидигә учриған. “һиндистан вақти гезити” ниң бу һәқтики хәвиридә хитай консулханисиниң һәрикити “дипломатик қаидә-йосунға хилап” дәп көрситилгән.

Ғәрбий бенгал валиси нараянан болса далай ламаниң пәйшәнбә күни елип берилған калкуттадики нутуқ сөзләш паалийитигә қатнишип, хитай тәрәпниң агаһландурушини диққәткә алмиған. Һиндистан ахбарат васитилириниң бу һәқтики хәвәрлиридә хитай консулханисиниң хети һиндистан һөкүмитиниң наразилиқини қозғиғанлиқи, һөкүмәтниң дипломатик қаналлар арқилиқ хитай билән закунлашқанлиқи илгири сүрүлди.

Хитай йеқинда һиндистанни далай ламаниң деңи деһлида хәлқара диний йиғин ечишиға йол қоюш билән әйибләп, хитай-һиндистан арисида өткән дүшәнбә күни ечилидиған чегра сөһбитини кечиктүргән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт