Dalay lama gollandiye ziyariti jeryanida Uyghurlarni qobul qilghan

Dalay lama yene 4 - iyun küni améstirdamdiki iwiru zalida bir yérim sa'etlik nutuq sözligen bolup, bu yighin'gha gollandiye Uyghurlarni himaye qilish jem'iyitining 5 ezasi qatnashqan we jem'iyet re'i'isi gheyretjan rozi dalay lamagha Uyghurche doppa kiygüzgen we Uyghurlarning en'eniwiy mirasi bolghan 12 muqamning may boyaq resimi hemde etles sharpa sowgha qilghan.

Dalay lama nechche ming kishi qatnashqan bu yighilishta Uyghurlarning doppisini 15 minut kiyip turup nutuq sözligen shundaqla Uyghurlarning meniwiy anisi rabiye qadir xanimni alahide tilgha alghan.

Etisi yeni 5 - iyun küni Uyghurlarni himaye qilish jem'iyitining 5 kishilik ezasi dalay lama chüshken méhmansarayda uning qobul qilishigha érishken we uning bilen sherqiy türkistan we tibet mesililiride söhbet élip barghan.

Gheyretjan ependining muxbirimizgha melumat bérishiche, dalay lama qobul jeryanida etrapidiki muxbirlar, dangliq erbaplar we amérikidin kelgen dangliq artislargha sherqiy türkistanning bügünki ehwali heqqide chüshenche bérip sherqiy türkistanning weziyitining tibet bilen oxshash ikenliki, xelq'ara jem'iyetning tibetlerge qandaq yardem qiliwatqan bolsa, Uyghurlarghimu shundaq yardem qilishi kérekliki toghrisida sözligen.

Dalay lamaning qobul qilishigha érishken gollandiyidiki dini zat hüsenjan ependimning déyishiche, dalay lama " musulmanlar yaxshi, islam dini yaxshi, dunyadiki her qaysi dinlar zulum we zorawanliqqa qarshi turidu. Xitaylar Uyghurlarni térorizimgha baghlap turup Uyghurlarni xalighanche tutqun qiliwatidu. Uyghurlarning milliy kimlikini we medeniyitini yoqitiwatidu. Men buninggha qattiq epsuslinimen " dégen we Uyghurlarmu tibetlerge oxshash ténch yol bilen özining kishilik hoquq we démokratiyisi üchün küresh qilishi we chet'elliklerni öz yurtlirigha bérip körüp kélishke dewet qilishi kérek, dégen.