Далай лама: 'хитай һөкүмити тибәтни дозахқа айландурди'

10 - Март тибәт роһаний даһийси далай ламаниң сүргүн болғанлиқиға 50 йил болған хатирә күн, бүгүн далай лама бу мунасивәт билән,тибәт сүргүн һөкүмити җайлашқан һиндистанниң дарамсала райониға дуняниң һәр қайси җайлиридин йиғилған 10 миңдин артуқ тибәтликләргә баянат берип " 50 йилдин буян хитай һөкүмити тибәт хәлқи үстидин тәсвирлигүсиз бастуруш, қирғинчилиқ йүргүзүп,тибәтни йәр шаридики дозахқа айландурди, тибәттә хитай тәрипидин өлтүрүлгән тибәтләр аз дегәндә йүз миңға йетиду " дәп хитайни қаттиқ тәнқид қилған.
Мухбиримиз гүлчеһрә
2009-03-10
Share

Нөвәттә далай ламаниң баянати хәлқаралиқ агентлиқлар һәмдә интернет учур васитилири арқилиқ пүтүн дуня ахбарат саһәсини қаплиди.

Дуняниң һәр қайси җайлиридики тибәт паалийәтчилири бүгүн җайларда түрлүк хатириләш, тәбрикләш паалийәтлирини уюштурмақта шундақла һәр қайси дөләтләрдики хитай әлчиханилири алдида тибәт паалийәтчилириниң хитай һөкүмитиниң тибәтни бесивалғанлиқиға қарши наразилиқ намайишлири давам әтмәктә.

Бүгүн хитай даирилириму хәлқара ахбарат васитилириға тибәт мәсилиси һәққидә җаваб беришкә мәҗбур болған болуп, хитай ташқи ишлар баянатчиси маҗавшү далай ламаниң баянатлирини ялғанға чиқарған вә " далай лама вә униң җуңго һөкүмити үстидин ялған явидақ сөз тарқатмақта" дәп әйиблигән.

Ройтерс вә б б с һәмдә франсийә агентлиқлирида далай ламаниң бүгүнки баянатлиридин нәқил елишичә, "далай лама хитай һөкүмитиниң бултурдин башлап тибәттә қанлиқ бастурушни тохтатмиди, тибәт хитай билән хошна,бизниң күтидиғинимиз қанунлуқ һоқуқ, һәқиқий аптономийә " дегән.

Б б с ниң хәвиригә қариғанда хитай даирилири тибәтләрниң 50 йилни хатирилиши яки бирәр вәқә туғдурушиниң алдини елиш үчүн қаттиқ һәрбий һаләт йүргүзгән. Шундақла һәр қандақ чәтәл агентлиқлириниң тибәткә киришини чәклигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт