Хитай үрүмчи вә ақсу қатарлиқ җайларда сахта дориларни тазилаш һәрикити елип барди

Хитай һөкүмәт ахбарат васитилириниң хәвәр қилишичә, 17-ноябир күни уйғур аптоном районлуқ җамаәт хәвпсизлик даирилири үрүмчи, ақсу қатарлиқ бир қисим шәһәрдә көп санда сақчи вә аманлиқ сақлаш хадимлирини ишқа селип, сахта дора сетиш гуруһлирини қолға чүшүргән.
Мухбиримиз үмидвар
2011.11.20
Шинхуаниң нәқил кәлтүрүшичә бу һәрикәткә 80 нәччә нәпәр җамаәт хәвпсизлик хадими қатнашқан болуп, бәш сахта дора сетиш шайкисини бирақла қолға чүшүргән. Бу һәрикәттә сақчилар сәккиз сахта дора ясаш орнини вәйран қилған һәмдә 170 миң юән қиммитидики 62 хил сахта дора түрини қолға чүшүргән.

Мәлум болушичә, сахта дора ясап сетиш пүтүн хитай бойичә узундин буян омумий йүзлүк давамлишип, күндин-күнгә еғирлишиватқан мәсилә болуп, уйғур ели тәвәсидә сахта дора содигәрлири вә ясиғучи шайкиларға кәң көләмлик һәм даим зәрбә бериш һәрикәтлири елип берилмиғанлиқтин, уйғур қатарлиқ хитай әмәс милләт пуқралириниң сахта дориларниң зийиниға учрап, һаяти вә саламәтлики җиддий тәһдитләргә дуч келиш әһвали бир қәдәр еғир болған.

Һәтта бәзи сәһийә хадимлири вә сәһийә тармақлириниңму сахта дора сатқучилар билән астиртин тил бириктүрүш вә яки мәсилигә сәл қараш әһвали мәвҗутлуқи тәнқид қилинған иди.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.