Қағилиқ наһийисидә қанунсиз диний паалийәтләрни назарәт қилишта хизмәт көрсәткәнләр тәқдирләнди
2013.01.15
Дуня уйғур қурултийи тәминлигән учурға қариғанда, бу чоң йиғинға йеза аһалиси, йеза кадир-рәһбәрлиридин болуп җәмий 600-500 әтрапида киши қатнашқан. Йеза рәһбәрлик даирилири йеза аһалисиниң диний паалийәтлирини башқуруш, назарәт қилиш үчүнла һәр саһә кишиләрдин 200 кишини мәхсус назарәтчиликкә қойған болуп, бу назарәтчиләрниң бир қисми шу күндики чоң йиғинда мукапатланған.
Дуня уйғур қурултийиниң баянатчиси дилшат ришитниң билдүрүшичә, бу 200 назарәтчи йезида өйму-өй кирип әһвал игиләш, назарәт қилиш, даириләргә учур йәткүзүш билән шуғулланған. У, уйғур хәлқи учраватқан диний бесимниң уйғурларни нәпәс алғусиз дәриҗигә әкелип қойғанлиқини билдүрүп, хитай һөкүмитидин бу сияситини дәрһал аяғлаштурушни тәләп қилди.
Хитай даирилири уйғур елидә йиллардин буян қанунсиз диний паалийәтләргә зәрбә берип кәлгән болсиму, әмма уларниң қандақ диний паалийәтниң қанунсиз һесаблинидиғанлиқи һәққидә ениқ чүшәнчә бәрмәй, уйғурларниң әң әқәллий динға ишиниш әркинликини, һәтта аялларниң яғлиқ чигиши, әрләрниң сақал қоюшиниму қанунсиз диний паалийәт категорийисидә бир тәрәп қилиши кишилик һоқуқ органлириниң қаттиқ тәнқид қилишиға учримақта.