Уйғур деһқан қизлири биңтуәнләргә ишләмчиликкә орунлаштурулмақта

Биңтуән хәвәрләр торидин ашкарилинишичә, бу йил язлиқ терилғу башлиниши билән қәшқәр, хотән һәмдә қизилсуниң йезилиридин уйғур деһқан яшлар уйғур елигә йәрләшкән хитай ишләпчиқириш қурулуш армийисиниң һәр қайси йеза игилик ишләпчиқириш мәйданлириға вақитлиқ ишләмчиликкә кәлмәктә.
Мухбиримиз гүлчеһрә
2009-05-05
Share

Хәвәрдә көрситилишичә пәқәт қағилиққа җайлашқан хитай биңтуәниниң йеза игилик мәйданлирида ишләватқан уйғур деһқанлар икки миңдин ашидикән.

Биңтуән йезилирида ишләмчилик қиливатқан деһқанларниңму көп сандикиси, уйғур елиниң җәнубидики йезилардики ешинча әмгәк күчи һесаблиниватқан ишсиз яшлар болуп, улар һөкүмәт даирилири тәрипидин қәрәллик һалда биңтуән йеза игилик ишләпчиқириш мәйданлириға барғандин кейин, йәр ағдуруш, уруқ селишқа охшаш деһқанчилиқ әмгәклирини қилидикән.

Хәвәрдә биңтуәнгә елип келингән уйғур ишләмчиләрниң иш һәққи һәққидә мәлумат берилмигән. Бу йил хитай даирилири уйғур йезилиридин сиртларға йөткәп ишқа орунлаштурулидиғанлар санини йәнә бир милйон бәш йүз миңға йәткүзмәкчи иди.

Биңтуән хәвәрлириниң йәнә бир учурида көрситишичә, һазир гәрчә язлиқ терилғу болуватқан алдираш пәйт болсиму, биңтуән деһқанлириниң май байримида саяһәткә чиқиш қизғинлиқи интайин юқири болған, пәқәт 89 ‏- поликтин бу байрамда сиртларға саяһәткә чиққанлар миңдин ашидикән.

Биңтуәнлик саяһәтчиләрниң баяничә, нөвәттә биңтуәнниң бейиған хитай деһқанлири һазир сода ‏- сетиқ қилип, игилигән деһқанчилиқ мәйданлириға уйғур вә хитайниң ичкири өлкилиридин кәлгән пәсиллик ишләмчиләрни ишлитидиған иқтисадий сәвийигә йәткән болуп, йеқинқи йиллардин бери пәсиллик ишчиларниң биңтуәнгә көпләп келиши билән биңтуән деһқанлириға деһқанчилиқ ишлиридин қоллири бошап, саяһәт вә сода ‏ - сетиқлар билән шуғуллиниш пурсити көп болмақта икән.

Йеқинқи ситатистикиларға қариғанда, уйғур елидики йәрлик деһқанларниң йиллиқ оттуричә кирими икки миң йүәнгиму йәтмәйду, әмма биңтуән деһқанлириниң йиллиқ оттуричә кирими йәттә миң йүән әтрапида. Биңтуәндики хитайларниң нопуси үч милйонға йеқинлашти.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.