Uyghur déhqan qizliri bingtu'enlerge ishlemchilikke orunlashturulmaqta

Xewerde körsitilishiche peqet qaghiliqqa jaylashqan xitay bingtu'enining yéza igilik meydanlirida ishlewatqan Uyghur déhqanlar ikki mingdin ashidiken.

Bingtu'en yézilirida ishlemchilik qiliwatqan déhqanlarningmu köp sandikisi, Uyghur élining jenubidiki yézilardiki éshincha emgek küchi hésabliniwatqan ishsiz yashlar bolup, ular hökümet da'iriliri teripidin qerellik halda bingtu'en yéza igilik ishlepchiqirish meydanlirigha barghandin kéyin, yer aghdurush, uruq sélishqa oxshash déhqanchiliq emgeklirini qilidiken.

Xewerde bingtu'en'ge élip kélin'gen Uyghur ishlemchilerning ish heqqi heqqide melumat bérilmigen. Bu yil xitay da'iriliri Uyghur yéziliridin sirtlargha yötkep ishqa orunlashturulidighanlar sanini yene bir milyon besh yüz minggha yetküzmekchi idi.

Bingtu'en xewerlirining yene bir uchurida körsitishiche, hazir gerche yazliq térilghu boluwatqan aldirash peyt bolsimu, bingtu'en déhqanlirining may bayrimida sayahetke chiqish qizghinliqi intayin yuqiri bolghan, peqet 89 ‏- poliktin bu bayramda sirtlargha sayahetke chiqqanlar mingdin ashidiken.

Bingtu'enlik sayahetchilerning bayaniche, nöwette bingtu'enning béyighan xitay déhqanliri hazir soda ‏- sétiq qilip, igiligen déhqanchiliq meydanlirigha Uyghur we xitayning ichkiri ölkiliridin kelgen pesillik ishlemchilerni ishlitidighan iqtisadiy sewiyige yetken bolup, yéqinqi yillardin béri pesillik ishchilarning bingtu'en'ge köplep kélishi bilen bingtu'en déhqanlirigha déhqanchiliq ishliridin qolliri boshap, sayahet we soda ‏ - sétiqlar bilen shughullinish pursiti köp bolmaqta iken.

Yéqinqi sitatistikilargha qarighanda, Uyghur élidiki yerlik déhqanlarning yilliq otturiche kirimi ikki ming yüen'gimu yetmeydu, emma bingtu'en déhqanlirining yilliq otturiche kirimi yette ming yüen etrapida. Bingtu'endiki xitaylarning nopusi üch milyon'gha yéqinlashti.