Dunya bankisi: dunya omumyüzlük iqtisadiy krizisning bosughisida

Bügün dunya bankisining bashliqi robért zéllik dunyaning omumiy yüzlük iqtisadiy ehwali heqqide toxtilip, “Néfit bahasining ösüp kétishi, ishsizliqning köpiyishi we ottura sherqtiki dawalghushlar dunyani omumiy yüzlük iqtisadiy krizisqa peqetla bir qedem ariliqta qaldurup qoydi dédi”.
Muxbirimiz ümidwar
2011.04.17

Roytérsning xewer qilishiche, bu sözni zéllik ependi xelq'ara pul-mu'amile fondigha eza memliketlerning maliye ministirliri we banka bashliqliri yighinning bügünki axirlishish peytide éytqan idi.

Shenbe künidiki yighinda mezkur döletler dunyada ashliq bahasining ösüp kétishi bilen téximu zor sandiki insanlarning kembeghelchilikke yüzliniwatqanliqini otturigha qoyghan bolsa, bügün dunya bankisining bashliqi robért zéllik dunyaning omumiy yüzlük iqtisadiy krizisning bosughisigha kélip qalghanliq bilen agahlandurdi.

Bu yighinda xelq'ara pul-mu'amile fondining mes'uli ishsizliq mesilisining dunya iqtisadigha körsitidighan tesiri heqqide toxtilip, yashlarning arisida ishsizliq nisbitining yuqiriliqi, hetta bir qisim yashlarning pütün ömür boyi ishsiz yashishi bilen ularning hemmini yoqatqan bir ewladqa aylinishi mumkinlikini körsetken idi.

Washin'gtonda ötküzülgen bu yighin jeryanida dunya iqtisadigha eng küchlük tesir körsetken döletlerning tizimliki turghuzulghan.

Yighin yer shari iqtisadining qayta yaxshilinish da'irisining kéngiyiwatqanliqi, biraq yaponiyidiki yer tewresh hem atom radi'o'atsiyisi weqesi hemde ottura sherqtiki dawalghushlarning buninggha tesir körsitidighan amillargha aylan'ghanliqini körsetken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.