Америка: хитай дуня сода тәшкилатиға киргәндә бәргән вәдилирини иҗра қилмиди

Америка сода вакаләтчиси ишханиси түнүгүн доклат елан қилип, хитайниң дуня сода тәшкилатиға киргәндә бәргән бәзи муһим саһәләрдики вәдисини пүтүнләй иҗра қилмиғанлиқини, һөкүмәтниң карханиларға арилишиш әһвали йәнила интайин еғир икәнликини билдүрди.
Мухбиримиз әркин
2009-12-23
Share

Америка сода вакаләтчиси ишханиси доклатта, хитай дуня сода тәшкилатиға әза болуп киргән 8 йилдин бери бир қатар иқтисади ислаһатларни елип барған болсиму, лекин йеқиндин буян һөкүмәт хитай карханилирини йөләйдиған вә қоғдайдиған сиясәтләрни йолға қоюп, карханиларға арилишишни күчәйткәнликини, бәзи саһәләрдә вәдисини иҗра қилмиғанлиқини, дуня сода тәшкилати алдидики мәҗбурийитини ада қилиш мәсилисидә еғир мәсилиләр көрүлгәнликини тәкитлигән.

Доклатта мундақ дейилиду : "америкидики бәзи кәспий орунларниң мөлчәригә қариғанда бу йил киргәндин буян нурғун бишарәтләр хитайниң базар иқтисадиға қарап илгириләш қәдими пүтүнләй тохтиғанлиқини көрсәтмәктә."

Доклатта йәнә хитайниң әқлий мүлүк һоқуқини қоғдашни күчәйтип, әқлий мүлүк һоқуқиға таҗавуз қилғучиларниң җинайи җавабкарлиқини сүрүштүрүш җәһәттики йетәрсизликләрни түгитиши тәләп қилинған шуниңдәк хитайда сахта малларни ишләш вә қанунсиз көчүрүп тарқитиш әһвалиниң йәнила наһайити еғирлиқи, бу америка карханилирини еғир зиянға учритиватқанлиқи илгири сүрүлгән.

Доклатта, әгәр сөһбәт икки тәрәп арисидики ихтилапни һәл қилалмиса, америкиниң иккиләнмәй сода қануни вә дуня сода тәшкилатиниң қаидә - йосуни даирисидә "хитайниң хәлқара содидики вәдисини иҗра қилишиға капаләтлик қилидиғанлиқи" тәкитләнгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт