Шихәнзидә електронлуқ қуран тарқатқан дада-бала диний затлар тутқун қилинған

Радио аңлиғучилиримиздин бириниң инкас қилишичә, шихәнзә шәһәрлик дөләт аманлиқ сақчилири, мәзкур шәһәрниң уйғурлар мәһәллисидә олтурушлуқ мәмәт реһим вә мәмәт сидиқ исимлик дада-бала диний затларни қанунсиз диний материялларни тарқатқан дегән гуман билән тутқун қилған.
Мухбиримиз шөһрәт һошур
2011.03.29
Share on WhatsApp
Share on WhatsApp

Сақчиларниң гуманиға дада-бала диний затларниң ниңшада ишләпчиқирилған електронлуқ қуранни өйидә сақлиғанлиқи вә тонуш-билишлиригә һәдийә қилғанлиқи сәвәб болған.

Шихәнзә шәһәрлик дөләт аманлиқ әтритидин вәқә һәққидә мәлумат сориғинимизда, әтрәт башлиқи су йиң дада-бала диний затларниң тутқун қилинғанлиқ әһвалиниң растлиқини билдүрди. Әмма, тутқунларниң нөвәттики әһвали вә тутулуш сәвәблири һәққидә мәлумат беришни рәт қилди.

Шихәнзиниң кона базар дегән мәһәллисидики аһалиләрниң билдүрүшичә, тутқунларниң аилә-тавабати вә мәсчит җамаити тутқунларниң әһвалидин хәвәр елиш үчүн сақчи орунлириға бирқанчә қетим илтимас сунған болсиму, илтимаси рәт қилинған.

640 Миң нопуслуқ шихәнзидә уйғурларниң нопуси 10миң әтрапида болуп, мана бу аз сандики уйғурларниңму шихәнзә даирилирини әндишигә селиватқанлиқи вә бу сәвәбтин қаттиқ назарәт астиға елиниватқанлиқи мәлум болмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.