Yawropa ittipaqining xitaygha qoyghan qoral- yaraq émbargosini kéler yilning bashliri bikar qilidighanliqi ilgiri sürüldi

Fransiye lémondié gézitining yawropa ittipaqi emeldarlirining sözini neqil keltürüp xewer qilishiche, yawropa ittipaqi xitay 1989 - yili tyen'enmén oqughuchilar démokratiye herikitini basturghandin kéyin, xitaygha qoyghan qoral-yaraq émbargosini kéler yilning bashliri bikar qilmaqchi iken.
Muxbirimiz erkin
2010-12-30
Share

Xewerde yawropa ittipaqi tashqi ishlar komissari katérin ashton xanimgha yéqin menbelerdin neqil keltürüp, qoral-yaraq émbargosining "pat yéqinda bikar qilinishi "mumkinliki bildürülgen. Lémondié gézitining ilgiri sürüshiche, béryusséldiki yawropa ittipaqining bir diplomatik emeldari bu heqtiki xewerni mu'eyyenleshtürüshni ret qilghan bolsimu, lékin ashton xanimning bu yil 16 ‏- we 17 ‏- dékabirdiki yawropa ittipaqi rehberlirining yighinigha doklat sunup, émbargoni bikar qilish teklipi bergenlikini bildürgen.

Ashton xanim yawropa ittipaqi rehberlirige sun'ghan doklatida émbargoning yawropa-xitay bixeterlik we tashqi siyaset jehettiki hemkarliqigha " chong tosalghu" peyda qiliwatqanliqini ilgiri sürgen. Bezi közetküchiler bu mesilining kéler yili 1 ‏- ayning otturiliri wén'griyide chaqirilidighan yawropa ittipaqi tashqi ishlar ministirlirining yighinida muzakire qilinidighanliqini perez qilishmaqta.

Xitay yawropa ittipaqidin qoral-yaraq émbargosini bikar qilishni izchil telep qilip kelgen idi. Yéqinda xitayning béryusséldiki bash elchisi sung ji, yawropa ittipaqi émbargoni bikar qilmisa, yawropa qoral-yaraq karxanilirining "pursetni qoldin bérip qoyidighanliqi " ni tekitligen. Lékin, amérika dölet mejlisi, teywen, xelq'ara kishilik hoquq teshkilatliri, Uyghur we tibet pa'aliyetchiliri yawropa ittipaqining émbargoni bikar qilishigha izchil qarshi turup keldi.

 Uyghur pa'aliyetchilirining ilgiri sürüshiche, xitaygha qoral-yaraq émbargosini bikar qilish xitaygha xata signal bérip, xitay qoralliq küchlirining Uyghurlarni basturushigha yéshil chiragh yaqqanliqtur. Lékin, yawropa ittipaqi émbargoni bikar qilish mesiliside izchil pikir birliki hasil qilalmay keldi. Ittipaqning bu yil 9 ‏- séntebirde chaqirilghan tashqi ishlar ministirliri yighinida bezi döletler émbargoni shertlik bikar qilishni telep qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet