خىتاي تاشقى ئىشلار مىنىستىرلىقى تۈنۈگۈن ئەرشىدىن ئىسرائىلنى تېررورلۇق بىلەن ئەيىبلەيدىغانلىقىنى جاكارلىغاندىن كېيىن ئېلان قىلىنغان مەزكۇر باياناتتا، ئەرشىدىن ئىسرائىلنىڭ جىنايىتىنىڭ پەقەتلا خىتايدىكى كىشىلىك ھوقۇق دەپسەندىچىلىكىنى ئاشكارىلاش ئىكەنلىكى، ئۇنىڭ خىتاي تۈرمىلىرىدىكى قېيىن-قىستاقلارنى دۇنياغا ئاشكارىلىغاندىن كېيىن خىتاي تەرىپىدىن تېررورچى دەپ ئەيىبلىگەنلىكى ئالاھىدە ئەسكەرتىلگەن.
دوكلاتتا مۇنداق دېيىلگەن:
ئەرشىدىن ئىسرائىل ئۇ بىر ۋىجدان مەھكۇمى، ئۇ ئۆزىنىڭ پىكرىنى ئەركىن ئىپادىلىگەنلىكى ئۈچۈن خىتاي تەرىپىدىن تۇتقۇن قىلىنغان. خىتاي دەرھال ئۇنى قويۇپ بېرىشى كېرەك. نۆۋەتتە ئۇ قاتتىق قېيىن-قىستاق ۋە ئادالەتسىز سوتنىڭ تەھدىتى ئاستىدا تۇرماقتا.
ئەرشىدىن ئىسرائىل خىتاي تۈرمىسىدە قېيىن-قىستاقتا ئۆلگەن شۆھرەت تۇرسۇننىڭ ئەھۋالىنى دۇنياغا ئاشكارىلىغاندىن كېيىن ھاياتى خەۋپ ئاستىدا قېلىپ قازاقىستانغا قېچىپ چىققان ۋە ب د ت نىڭ مۇساپىرلار ئىشخانىسىدىن پاناھلىق تىلىگەن. ئۇ مۇساپىرلىق سالاھىيىتىگە ئېرىشكەن ۋە شۋېتسىيە تەرىپىدىن قوبۇل قىلىنغان بولسىمۇ، كېيىن ب د ت مۇساپىرلار ئىشخانىسىنىڭ ئۇنىڭ مۇساپىرلىق سالاھىيىتىنى بىكار قىلىشى ۋە قازاق دائىرىلىرىنىڭ خەلقئارا ئەھدىنامىلەرگە خىلاپلىق قىلىشى بىلەن ئۇ 30-ماي كۈنى خىتايغا قايتۇرۇپ بېرىلگەن ئىدى.
نۆۋەتتە دۇنيا ئۇيغۇر قۇرۇلتىيى، رافتو كىشىلىك ھوقۇق فوندى قاتارلىق كىشىلىك ھوقۇق ئورگانلىرى ۋە ئۇنىڭ ئەھۋالىدىن خەۋەردار كىشىلەر ئەرشىدىن ئىسرائىلنىڭ تەقدىرىدىن قاتتىق ئەندىشە قىلماقتا.