Tetqiqatchi chén xénende qan arqiliq yuqumlan'ghan eydiz bimarliri heqqide ochuq xet élan qildi
2012.09.25
U xétide ötken esirning 90-yillirida, xénende yüz bergen qan arqiliq yuqumlan'ghan eydiz bimarliri mesiliside biwasite jawabkarliqi bar dep qaralghan, hazirqi xitay siyasiy byuro ezasi li changchün we 18-qurultaydin kéyin xitay bash ministiri wezipisige teyinlinish aldida turghan li kéchangning eydiz késilining qan arqiliq tarqilishidiki mes'uliyitini sürüshtürüshni telep qilghan.
Xette bayan qilinishiche, 90-yillarda xénende ölke bashliqi wezipisini ötigen li kéchang we shu yillarda xénende “Qan jewhiri iqtisadi” ni teshebbus qilghan li changchün qatarliq emeldarlarning, shu yillarda xénende yüz bergen 300 ming ademning qan arqiliq eydiz wirusi bilen yuqumlinish, 100ming ademning eydiz késili bilen ölüshidek paji'ede biwasite jawabkarliqi bolsimu, emma bu mesile hazirghiche sürüshtürülmigen, qan sétish sewebidin yuqumlan'ghan eydiz bimarlirighimu héchqandaq tölem bérilmigen.
Mezkur xetning aptori chén famililik sehiye xadimi bügün erkin asiya radi'osining ziyaritini qobul qilip, xénende yüz bergen qan arqiliq yuqumlan'ghan eydiz bimarliri mesiliside biwasite jawabkarliqi bar emeldarlarning polattek pakit turuqluq, 20 yilghiche qanuniy jazagha tartilmasliqida, ularning arqisida küchlük arqa tiriki barliqidin ikenlikini tekitlidi.
Chén ependi bayanida, özining hazirghiche xitay hökümitige bu heqte yette qétim doklat yollighan bolsimu, emma 4-qétimliq doklattin kéyin da'iriler uni saqchilar arqiliq agahlandurup tehdit qilip kelgenlikini, shunga özining rak késilining axirqi mezgilide turuwatqan bügünki künde ochuq xet élan qilish yoli arqiliq ashu eydiz bimarliri üchün adalet telep qilish qararigha kelgenlikini bildürdi.