Xongkongdiki kishilik hoquq teshkilati ey wéywéyni qoyup bérishni telep qildi

Fransiye agéntliqining xewer qilishiche, bu teshkilat xitay hökümitining ey wéywéyni qolgha élip bir ay bolghuche héchqandaq éniq melumat bermigenlikini tenqid qilip, uni derhal qoyup bérishni telep qilghan.

Mezkur teshkilat bashliqi li chéngyu'en öz bayanatida “Xitayda ey wéywéyge oxshash qolgha élinip ketken yene nurghun aktiplar bar, xitaydiki bu bir partiyilik tüzüm ayaqlishishi kérek” dégen.

Sen'etkar ey wéywéy 3-aprél küni béyjing ayrodromidin seperge atlinish aldida turghanda qolgha élin'ghan idi.

U yéqindin buyan xitayda qozghilish éhtimali bolghan yasimen güli inqilabining aldini élish üchün xitay teripidin qolgha élin'ghan kishilik hoquq aktiplirining ichide eng küchlük tesir qozghighanlirining biridur.

Royétérs agéntliqining xewer qilishiche, xitayda kishilik hoquq aktiplirining “Ghayib bolush” ehwali yene dawamlashmaqta.

Igilinishiche, ötken jüme küni tonulghan kishilik hoquq adwokatliridin li fangping öyining aldida xitay jama'et xewpsizlik tarmaqliri teripidin élip kétilgendin béri, uning ayali 3 kündin buyan uning héchqandaq iz-dérikini alalmighan.

Li fangping xitaydiki xujyagha oxshash tonulghan kishilik hoquq aktiplirining adowkatliqini qilghan we shundaqla yene, xitaydiki intérnét erkinlikini cheklesh mesilisi we balilarning zeherlik süt parashoki bilen zeherlinish weqesige qarshi élip bérilghan pa'aliyetlerdimu aktip rol oynighan bir adwokat idi.

Xitayda yéqindin buyan kishilik hoquq we pikir erkinliki üstidin yürgüzülüwatqan bésimning éghirlishishi xelq'ara jama'etning diqqitini qozghawatqan bolup, aldinqi hepte amérika-xitay kishilik hoquq söhbitidimu amérika terep xitaydiki kishilik hoquq aktiplirining ghayib bolush we qanunsiz qolgha élinish mesilisini alahide otturigha qoyghan idi.