Xitay da'iriliri sen'etkar ey wéywéyni képilge qoyup bergenlikini bildürdi
2011.06.22
Bügün xelq'ara metbu'atlardimu bu yil 3-aprél küni xitay da'iriliri teripidin béyjing xelq'ara ayrodromida qolgha élin'ghan ey wéywéyning képilge qoyup bérilgenliki heqqidiki xewer delillendi.
Bu yil 4-ayning 3-küni ey wéywéy tutqun qilin'ghandin buyan chet'ellerdiki xitay démokratliri xongkong hem dunyaning herqaysi jaylirida üzlüksiz namayish qilip xitay hökümitidin ey wéywéyni qoyup bérishni telep qilip kelgen idi.
Xelq'ara insan heqliri teshkilatliri hem gherb döletlirimu ey wéywéy mesiliside xitay hökümitini eyiblep kelgen idi. Emma xitay da'iriliri ey wéywéyni iqtisadiy jinayet bilen eyiblep tutqun qilghanliqini bildürgen idi.
Bügün béyjing saqchi da'iriliri ey wéywéyning öz jinayitini tonush pozitsiyisining yaxshi bolghanliqi hem késili bolghini üchün uning türme sirtida dawalinishi üchün képilge qoyup bérilgenlikini bildürdi.
Ey wéywéy özining sen'et eserliri arqiliq xitay hökümet da'irilirini tenqidlep kéliwatqan öktichilerning biri idi. Shunga u yéqinqi birnechche yildin buyan, xitay da'iriliri teripidin sezgür shexsler qatarida mu'amile qilinip, uning pa'aliyetliri cheklimige uchrap kelgen idi.