Xitay, filimlirini tokyo xelq'ara filim féstiwalidin chékindürüp chiqqan

Shinxu'a agéntliqining xewer qilishiche, xitay sen'etchiliri kino filimini tokyo xelq'ara filim féstiwaligha qatnashturushtin chékindürüp chiqip, yaponiyige sénkaku yaki “Dyawyü” arallirining igilik hoquqi heqqide naraziliq bildürgen.
Muxbirimiz erkin
2012.10.19

Bu qétimqi xelq'ara filim féstiwalida xitay rézhissor wangjingning “Féngshüy” namliq filimi mukapatqa namzatliqqa körsitilgen idi. Lékin tokyo xelq'ara filim féstiwali teshkili orginining bildürüshiche, ular xitay tereptin mezkur filimning féstiwaldin chékinip chiqqanliqi heqqide resmiy uqturush tapshuruwalmighan. Shunga mezkur filimni féstiwalda qoyushni qarar qilghan.

Lékin filim ishligüchiler peyshenbe shinxu'a axbarat agéntliqi arqiliq bayanat élan qilip, filimni yaponiyige naraziliq bildürüsh yüzisidin chékindürüp chiqqanliqini bildürgen. Ularning bildürüshiche, “Yaponiye hökümiti we ongchilar arallar mesiliside durus bolmay, junggo xelqining könglige azar bergen” iken.

Xitay edebiyat-sen'et sahesidikilerning hökümetni yaqlap, xelq'ara sen'et, kino féstiwallirini bayqut qilish weqeliri da'im yüz bérip turidighan hadise. 2009‏-Yili xitay filim sahesidikiler mélburn xelq'ara filim féstiwalini bayqut qilghan.

Chünki mélburn filim féstiwali xitayning telipini ret qilip, d u q re'isi rabiye qadir xanim téma qilin'ghan “Muhebbetning 10 sherti” namliq höjjetlik filimni féstiwalda qoyushni qarar qilghan idi.

Tokyo xelq'ara filim féstiwali 28‏-öktebir ötküzülidu. Mezkur féstiwalda 15 xelq'ara filim mukapat namzatliqigha körsitilgen. Bu mezkur filim féstiwalining 25‏-qétim ötküzülüshidur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.