Филиппиндики гөрүгә елиш вәқәсидә 9 хоңкоңлуқ өлди

Филиппинниң пайтәхти манилада хоңкоңлуқ саяһәтчиләрни әп маңған бир аптомобил гөрүгә елинип, 9 хоңкоңлуқ саяһәтчи өлтүрүлди. Бирләшмә агентлиқиниң хәвәр қилишичә, җинайәтчи 55 яшлиқ, пенсийигә чиққан бир сақчи офитсери болуп, у қорал арқилиқ көпинчиси хоңкоңлуқ саяһәтчиләрдин тәркип тапқан бир саяһәт аптобусини тохтитип, 20 әтрапида кишини гөрүгә еливалған.
Мухбиримиз ирадә
2010.08.23

Филиппин сақчи даирилири аптомобилдики кишиләрни қутқузушқа һәрикәт қилған. Әмма җинайәтчи мендоза гөрүгә елинғанларни өлтүрүш билән сақчиларға тәһдит қилған. Өзиму бурун сақчи болған мендоза сақчиларниң тактикилирини яхши билгәнликтин уни контрол астиға елиш асанға тохтимиған.

Нәтиҗидә 10 саәт давам қилған тиркишиштин кейин қатил сақчилар тәрипидин етип өлтүрүлгән. Вәқәдә 9 хоңкоңлуқ өлгән, иккиси еғир яриланған.

Бүгүн хоңкоң һөкүмити баянат елан қилип, филиппиндики вәқәдин қаттиқ әпсусланғанлиқини билдүрди. Һөкүмәт даирилири "қара сигнал" елан қилип, филиппингә баридиған саяһәтчиләрни бихәтәрлик һәққидә агаһландурди.

Игилинишичә, әслидә сақчи офитсери болған җинайәтчи роландо мәндоза илгири зәһәр әткәсчилики вә чириклик сәвәбидин иштин чиқирилған болуп, у өзиниң ақлинишини вә ишқа қайтишни тәләп қилип, мәзкур вәқәни садир қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.