20 Дөләт гуруһиниң башлиқлар йиғини сеулда ечилди

Тәрәққи қилған вә тәрәққи қиливатқан әлләрдин қурулған 20 дөләт гуруһиниң башлиқлар йиғини пәйшәнбә күни җәнубий корийә пайтәхти сеулда чақирилди.
Мухбиримиз әркин
2010-11-11
Елхәт
Пикир
Share
Принт

Америка президенти обама билән хитай дөләт рәиси ху җинтав йиғин җәрянида айрим учришип, хәлқ пулиниң курсини өстүрүштин тартип, әқлий мүлүк һоқуқини қоғдашқичә болған бир йүрүш мәсилиләр үстидә сөһбәт елип барған.

Америка ташқи ишлар министирлиқиниң хәлқара ишларға мәсул муавин министири лаел брейнардниң әскәртишичә, ху җинтав хитайниң хәлқ пули курсини тәңшәш җәһәттики вәдисини тәкрарлиған вә һазирғичә мәлум илгириләшкә еришкәнликини қәйт қилип, хитайниң пул ислаһатини муқим қәдәм билән алға сүридиғанлиқини билдүргән.

Президент обама хитайдин америка көңүл бөлидиған бәзи негизлик мәсилиләрни җүмлидин әқлий мүлүк һоқуқини қоғдашни тәләп қилған. Ху җинтав болса хитайниң юмшақ детал оғрилиқидин сақлиниш җәһәттә қолға кәлтүргән нәтиҗисини көрситип өткән.

Мәтбуатлар, гәрчә икки дөләт рәһбири һәр қайси саһәләрдики һәмкарлиқни күчәйтишни тәкитлигән болсиму, лекин хәлқ пулиниң курси қатарлиқ ачқучлуқ мәсилиләрдики пикир ихтилапи бирликкә кәлмигәнликини илгири сүрмәктә.

Хитай әмәлдарлири пәйшәнбә күни елан қилған баянлирида тәрәпләрниң чоң мәсилиләрдики пикир ихтилапи йәнила бирликкә келип болалмиғанлиқини билдүргән. Обама америка билән хитайниң дунядики икки чоң иқтисади гәвдә болуш сүпитидә иқтисади тәңпуңлуққа капаләтлик қилиш мәҗбурийити барлиқини тәкитлигән.

Обама ху җинтав билән көрүшкән шу күни йәнә, җәнубий корийидә турушлуқ америка армийисини көздин кәчүргән иди. У америка әскәрлириниң лагирини көздин кәчүргәндә 1950‏ - йили партлиған корийә урушиға баһа берип, америка армийисиниң әйни чағда бәргән қурбанлиқи җәнубий корийиниң бүгүнки гүллиниши вә демократийисиниң асасини қурди дегән. У йәнә, шималий корийини йөлүнүшини өзгәртип, ядро қораллардин ваз кечишкә, җәнубий корийә билән биргә тинчлиқ вә гүллиништин бәһриман болушқа чақирған.

Пикирләр (0)
Share
Толуқ бәт