Б д т хитай һөкүмитидин кишилик һоқуқ адвокати гав җишиңни қоюп беришни тәләп қилди

Б д т ниң бир комитети хитай һөкүмитидин из-дерәксиз йоқап кәткән кишилик һоқуқ адвокати гав җишиңни қоюп беришни тәләп қилип, униң давамлиқ тутуп турулуши хәлқара қанунларға хилап икәнликини билдүрди.
Мухбиримиз әркин
2011.03.28

Хәвәрләрдин мәлум болушичә, б д т ниң из-дерәксиз йоқап кәткәнләрни сүрүштә қилиш хизмәт комитети өткән йили 7‏-айда дипломатик қаналлар арқилиқ хитай һөкүмитидин гав җишиңни қоюп беришни тәләп қилған. Лекин, мәзкур хәвәр дүшәнбә күни “дәрһал әркинлик” намлиқ бир хәлқара қанун қоғдаш тәшкилатиниң торида елан қилинди.

Мәзкур тәшкилатниң тор бетидики хәвәрдин ашкарилинишичә, б д т хитай һөкүмитидин йәнә, бу зиянкәшликни пәйда қилған сәвәбләрни түзитишни тәләп қилип, гав җишиңниң тутуп турулуши хәлқара қанунларға хилап икәнликини, чүнки гав җишиң өзиниң түп һоқуқини қолланғанлиқини, хитай һөкүмитиниң бу җәһәттики хәлқара өлчәмләргә хилаплиқ қилғанлиқини тәкитлигән.

Бу хәвәр б д т кишилик һоқуқ кеңишиниң өткән ай җәнвәдә башланған кишилик һоқуқ йиғини 25‏-март күни ахирлишип, икки күндин кейин елан қилинған. Из-дерәксиз йоқап кәткәнләр мәсилиси җәнвәдики йиғинда музакиригә қоюлуп, һәр қайси әлләр вә хәлқара тәшкилатлар тәрипидин муназирә қилинған иди. Йиғинда бәзи хәлқара аммиви тәшкилатлар б д т дин 5-июл үрүмчи вәқәсидә из-дерәксиз йоқап кәткән уйғурларниң из-дерикини қилишни тәләп қилған.

Гав җишиң, хитайдики тонулған кишилик һоқуқ паалийәтчилириниң бири болуп, у хитай асасий қанунини ислаһ қилиш чақириқи һәм фалунгоң муритлирини өз ичигә алған қамақтики бәзи диний затларни ақлаш ишлириға қатнашқан иди.

У 2009‏-йили бир қетим из-дерәксиз йоқап кетип, хәлқара җәмийәтниң бесимида кейинки йили 3‏-айда қоюп берилгән. Лекин у 2010 -йили 4‏-айда йәнә из-дерәксиз йоқап кәткәндин буян, һазирға қәдәр һечқандақ из-дерики болмиған иди. Гав җишиңниң аяли буниңдин бир күн бурун ню-йорк вақти гезитиниң йәкшәнбә күнлүк санида мақалә елан қилип, президент обамадин йолдишиниң қоюп берилишигә ярдәм қилишни сориған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.