Германийә баш министири хитайдин иранниң ядро мәсилисини һәл қилишта актип рол ойнашни тәләп қилди

Бирләшмә агентлиқиниң ейтишичә, меркел сөһбәт җәрянида хитайниң иранни ядро паалийәтлирини аяғлаштурушқа көндүрүши керәкликини ейтқан. Әмма хитай тәрәп иранға нефит имбаргоси қоюшқа қарши чиқидиғанлиқини ейтқан.

Меркел мухбирларға бу һәқтә қилған сөзидә “мәсилә қандақ қилип иранға дуняға йәнә бир ядро дөлити лазим әмәсликини чүшәндүрүштин ибарәт. Хитай бу йәрдә иран билән болған қоюқ мунасивитини ишқа селиши керәк” дегән.

Бу қетимлиқ зиярәтниң рәсмий күн тәртипи бойичә германийә баш министири ангела меркел җүмә күни хитай дөләт рәиси ху җинтав билән учришиду. Гәрчә униң бу қетимлиқ зияритиниң асаслиқ темиси иқтисади мәсилиләр болидиғанлиқи ениқ болсиму, әмма у сәпәргә атлиништин бурун, һәрқайси кишилик һоқуқ органлири униңдин хитайға кишилик һоқуқ мәсилисидә бесим ишлитишни тәләп қилған иди.

Ангела меркел пәйшәнбә күни өзиниң учришишларда кишилик һоқуқ вә дөләтни қанун арқилиқ идарә қилишқа охшаш сәзгүр мәсилиләрни тилға алидиғанлиқини ейтқан, әмма ениқ йип учи бәрмигән.

Игилинишичә, меркел йәнә шәнбә күни гуаңҗуға берип, у йәрдики католик черкавини зиярәт қилип, католик муртлар билән бир ариға келидикән.