Gérmaniye bash ministiri xitaydin iranning yadro mesilisini hel qilishta aktip rol oynashni telep qildi

Gérmaniye bash ministiri an'géla mérkélning xitay ziyariti peyshenbe küni resmiy bashlandi. Mérkél bügün xitay bash ministiri wén jyabaw bilen uchrashqan bolup, ikki terep asasen gérmaniye-xitay arisidiki soda munasiwiti, yawropaning iqtisadiy krizisi we iranning yadro mesilisi heqqide söhbetleshken.
Muxbirimiz irade
2012.02.02

Birleshme agéntliqining éytishiche, mérkél söhbet jeryanida xitayning iranni yadro pa'aliyetlirini ayaghlashturushqa köndürüshi kéreklikini éytqan. Emma xitay terep iran'gha néfit imbargosi qoyushqa qarshi chiqidighanliqini éytqan.

Mérkél muxbirlargha bu heqte qilghan sözide “Mesile qandaq qilip iran'gha dunyagha yene bir yadro döliti lazim emeslikini chüshendürüshtin ibaret. Xitay bu yerde iran bilen bolghan qoyuq munasiwitini ishqa sélishi kérek” dégen.

Bu qétimliq ziyaretning resmiy kün tertipi boyiche gérmaniye bash ministiri an'géla mérkél jüme küni xitay dölet re'isi xu jintaw bilen uchrishidu. Gerche uning bu qétimliq ziyaritining asasliq témisi iqtisadi mesililer bolidighanliqi éniq bolsimu, emma u seperge atlinishtin burun, herqaysi kishilik hoquq organliri uningdin xitaygha kishilik hoquq mesiliside bésim ishlitishni telep qilghan idi.

An'géla mérkél peyshenbe küni özining uchrishishlarda kishilik hoquq we döletni qanun arqiliq idare qilishqa oxshash sezgür mesililerni tilgha alidighanliqini éytqan, emma éniq yip uchi bermigen.

Igilinishiche, mérkél yene shenbe küni gu'angjugha bérip, u yerdiki katolik chérkawini ziyaret qilip, katolik murtlar bilen bir arigha kélidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.