Bawariye bash ministiri xitayning myunxéndiki Uyghur teshkilatlirini térrorluq guruh dep tonush telipini ret qilghan

Gérmaniye metbu'atlirining xewerliride, bawariye shtatining bash ministiri xorist séxofér xitayni ziyaret qilip, xitay bilen söhbet élip barghanliqini, söhbet jeryanida xitay rehberlirining dunya Uyghur qurultiyi qatarliq bawariyediki Uyghur teshkilatlirining pa'aliyitini térrorluq heriket dep tonushni telep qilghanliqini, lékin xorist séxoférning bu telepni ret qilghanliqini ilgiri sürgen.

Bawariye ichki ishlar ministirliqi myunxéndiki bir yerlik gézitte bayanat élan qilip, "gérmaniyide pa'aliyet élip bériwatqan teshkilatlarni, bolupmu dunya Uyghur qurultiyini diniy esebilikni teshebbus qilidu we térrorluq meqsiti bar dep qarash yaki zorawanliqni qollaydu dep hésablashning héchqandaq sewebi yoq" dep tekitligen.

Bayanatta yene, gérmaniyidiki étnik guruhlarning xitaydiki Uyghur az sanliqlarni zorawanliqqa yétekligenlikige da'ir héchqandaq pakit yoqluqini bildürgen. Bawariye Uyghurlarning siyasiy herikiti eng aktip rayonlarning biri bolghanliqtin, xitay hökümiti uzundin béri diqqet qilip kelgen idi.

Ötken yili 11 ‏ - ayda gérmaniye saqchiliri myunxéndiki bir turalghuda axturush élip bérip, mezkur sheherdiki Uyghurlarni közitiwatqan 4 neper xitay jasus gumandarini tekshürgen idi.