Гуаңдуңда оқутқучилар төвән иш һәққигә қарши наразилиқ намайиши қилди

Хоңкоң мәтбуатлири һәм әнглийә б б с агентлиқи қатарлиқларниң хәвәр қилишичә, гуаңдуң өлкиси хуаҗу шәһиридики нәччә миңлиған оқутқучи, хитайниң дөләт байрими мәзгилидә намайиш қилип, оқутқучиларниң төвән иш һәққи һәм мал баһаси өрләватқан шараитта иш һәққиниң йәрлик даириләр тәрипидин изчил тутуп қелинишиға наразилиқ билдүргән.
Мухбиримиз меһрибан
2011.10.04

Мәлум болушичә, гуаңдуңниң хуаҗу шәһиридики оттура башланғуч мәктәп оқутқучилириниң мааши гуаңдуңниң башқа җайлиридин изчил төвән болуп, йәрлик даириләр юқириға оқутқучиларниң айлиқ маашини 3000 йүән хәлқ пули дәп мәлум қилған болсиму, әмма оқутқучиларниң әмәлийәттә алидиған иш һәққи адәттә 800 йүәндин 1000 йүәнгичә болған.

Дөләт штатида болмиған хәлқ оқутқучилириниң айлиқ иш һәққи техиму төвән болуп, уларниң айлиқ иш һәққи 300 йүәндин 400 йүәнгичә болған.

Хәвәрдә дейилишичә, йеқиндин буян хитайда мал баһаси нәччә һәссә өрлигән болсиму, әмма хуаҗу шәһиридики оттура-башланғуч мәктәп оқутқучилириниң мааши задила өсмигән.

Йәрлик даириләр болса түрлүк баһаниләр билән оқутқучиларниң маашини тутуп қалған. Бу әһвал оқутқучиларниң наразилиқини қозғап, бу қетимлиқ зор көләмлик наразилиқ намайишиниң партлишиға сәвәб болған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.