Gu'angjuda chet'ellikler namayish qilip ölüp ketken afriqiliq üchün adalet telep qildi

19-Iyun seyshenbe küni 100 din artuq chet'ellik gu'angjudiki ku'angchüen saqchixanisi aldigha toplinip, 18-iyun düshenbe küni gu'angjudiki melum istirahet baghchisida urup öltürülgenliki ilgiri sürülgen bir afriqiliq üchün naraziliq bildürdi.
Muxbirimiz méhriban
2012.06.19

Xitay tor béketliride weqede ölgen afriqiliq heqqide bir-birige oxshimighan 2 xil xewer tarqalghan. Bezi xewerlerde bu afriqiliqning baghchidiki oyunchuq mashinining xitay xojayini teripidin urup öltürülgenliki bayan qilinsa, yene bezi xewerlerde uning saqchixanida soraq qilinish jeryanida ölgenliki ilgiri sürülgen.

“Jenubiy junggo géziti” ning xewer qilishiche, 18-iyun chüshtin kéyin gu'angju ku'angchüen istirahet baghchisigha köngül échish üchün kelgen bir afriqiliq bilen oyunchuq mashinining xojayini otturisida baha taliship, jédel chiqqan. Ular shu küni chüshtin kéyin sa'et 1 lerde shu etraptiki ku'angchüen saqchixanisigha soraq qilish üchün élip kétilgen. Mezkur afriqiliq er chüshtin kéyin sa'et 5 lerde saqchixanida hoshidin kétip, doxturxanigha apirilghan bolsimu, qutquzush ünüm bermey ölüp ketken.

Gu'angjudin radi'omiz ziyaritini qobul qilghan li ependining bildürüshiche, seyshenbe küni chüshtin kéyin özlirini ölüp ketken afriqiliqning yurtdashliri dep atighan yüz nechche afriqiliq yolni tosuwélip naraziliq bildürgen. Shu etraptiki dukanlar buyruq bilen tijaretni toxtatqan. Namayish jeryanida ghezeplen'gen namayishchilar namayishini tinchitish üchün kelgen saqchilargha botulka qatarliqlarni atqan, namayish3 sa'et dawamlashqandin kéyin tarqitiwétilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.