Güentanamo türmisidiki Uyghurlar obamadin özlirining téxiche qoyup bérilmeslikige jawab bérishni telep qildi
Muxbirimiz gülchéhre
2009.06.02
2009.06.02
Fransiye axbaratining seyshenbe künidiki xewirige qarighanda, yéqinda güentanamoni ziyaret qilghan muxbirlar bu jayda tutup turuwatqan Uyghurlarni ziyaret qilghinida, güentanamodiki 17 neper Uyghur obama hökümitidin özlirini qoyup bermeslikining sewebini sorighan hemde amérika hökümitining özlirini gunahsiz dep jakarlighan turup hazirghiche tutup turuwatqanliqini eyibligen.
Ular muxbirlargha " adalet dégen qéni?", "bizge erkinlik kérek", "biz ilgiri xitayda ézilgen, biz amérikida ikkinchi qétim ézilishke uchrawatimiz," dégen hemde obama hökümitining özlirini tézdin erkinlikke chiqirishni telep qilghan.
Güentanamodiki Uyghurlarning adwokatlirining ipadilishiche, gerche bu 17 neper Uyghur, güentanamo herbiy türmisidiki éghir jazalidighan jinayetchilerdin ayrilip,igwana lagéri dep atalghan üsti ochuq, bir qeder erkin türmide turuwatqan bolsimu, yenila mehbus qatarida tutup turulmaqta shundaqla yette yildin béri bu Uyghurlarning rohiy jehettin tartqan azablirini teswirlesh tes bolsimu,ularning bashqa mehbuslargha qarighanda rohiy haliti intayin turaqliq iken.
Bu Uyghurlarning terjimanliqigha qatnashqan bir neper terjimanning bildürüshiche, égwanagha chiqqandin kéyin bu Uyghurlar özliri emgek qilip köktat hem qoghun térighan bolup, ularning chünikide ikki tal chilge chüshken iken. Bu Uyghurlarning 7 yildin buyan mehbusluq hayatida tunji qétim öz qoli bilen emgek qilip méwisini körüshi hésablinidu.