Güentanamo tutqunlirining biri tunji qétim amérika tupriqigha élip kélindi

9 ‏- Iyun seyshenbe küni, güentanamo türmisige qamalghan axmed qalfan gheylani, alahide herbiy chariler bilen güentanamodin nyuyorktiki fédéral sotigha élip kélindi.
Muxbirimiz gülchéhre
2009-06-09
Élxet
Pikir
Share
Print

Bu amérika hökümiti teripidin güentanamo herbiy türmisige qamalghan tutqanlarning tunji qétim amérika tupriqigha yötkilishi hésablinidu. Amérika axbaratlirining seyshenbidiki xewerliride körsitilishiche, nyuyorktiki amérika fédéral sotida bügün axmad qalfan gheylani 1998 - yilidiki tanzaniye we kéniyidiki ikki amérika konsulxanisini partlitish weqeside asasliq rol oynighanliqi shundaqla bu weqede 12 amérika puqrasini öz ichige alghan 224 bigunah kishining ölüshini keltürüp chiqarghanliqi bilen eyiblen'gen.

Amérika herbiy da'irilirining éniqlishiche, gheylani 1998 - yilidiki elqa'ide teshkilatining ikki qétimliq amérika konsolini partlitishqa oxshash térrorloq heriketliride muhim rol oynighandin kéyin afriqidin ayrilip, elqa'ide rehbiri osama binladin'gha qoghdighuchi bolghan. U, 2004 - yili pakistanda amérika herbiy qisimliri teripidin tutulup ikki yildin kéyin térror gumandari qatarida alahide ching tedbirler élin'ghan güentanamo herbiy türmisige qamalghan.

Gerche gheylani elqa'ide we bin ladin bilen munasiwetlik, térrorloq hujumlargha qatniship 200 din artuq ademning ölüshini yene minglarche kishining yarilinishini keltürüp chiqarghan jinayet bilen eyiblen'gen bolsimu, gheylani hazirgha qeder jinayitige iqrar bolmighan. Gheylanining soti uzun'gha sozulushi mumkin.

Shu qétimliq amérika konsulxanilirining partlitilishigha munasiwetlik yene bashqa töt kishi nyuyork fédéral sotida ömürlük qamaq jazasigha höküm qilin'ghan idi.

 Güentanamo türmisini taqashqa 7 ay qaldi, obama hökümiti türme taqalghandin kéyin güentanamo tutqunlirining bezilirining öz döletlirige qayturulidighanliqini we bezilirining bashqa döletlerge orunlashturulidighanliqini shundaqla éghir jinayetler bilen qamalghan bezi tutqunlarning amérika tupriqidiki türmilerge élip kélinidighanliqini bildürmekte. Gheylanining bügün güentanamodin tunji bolup amérikigha dessishi,güentanamo tutqunlirini amérika tupriqigha élip kélishtiki muhim bir qedem bolushi mumkin.

Toluq bet