Гүәнтанамо уйғурлириниң адвукатлири обамаға хәт йезип уларни қоюп беришкә йәнә чақирди

Гүәнтанамодики уйғурларни өз ичигә алған 20 нәпәр тутқунниң адвокатлири америка президенти барак обамаға хәт йезип, тутқунларни қоюп беришкә йәнә бир қетим чақирди.
Мухбиримиз әркин
2009-02-27
Share

Обамаға йезилған хәттә, лагердики 20 кишиниң федерал сот мәһкимисидики давада утуп чиққанлиқиға қаримай һазирға қәдәр дунядики әң начар түрмидә йетиватқанлиқини тәкитлигән болуп, "бу кишиләрни давамлиқ түрмидә тутуп туруш бизни бихәтәрликкә ериштүрмәйду шундақла бу америка үчүн бир шәрмәндичиликтур" дегән.

Америка федерал әрзийәт соти йеқинда төвән сотниң уйғурларни америка қоюп бериш қарарини ағдуруп ташлап, уйғурларни америкиға қоюп беришкә пәқәт президентниң күчи йетидиғанлиқини илгири сүргән иди. Адвокатлар америка қоюп беришни тәләп қилған 20 нәпәр тутқунниң 17 нәпири уйғур. Буш һөкүмити 2003 ‏ - йили гуәнтанамодики уйғурларниң көп қисимини "хата җай вә хата вақитта" туруп қалған кишиләр, дәп ақлиған иди.

Президент обама бу йил 20 ‏ - январдики қәсәм бериш мурасимида сөзлигән нутқида "бизниң адалитимиз бихәтәрликимизниң тәминати" дегән. Уйғурларни орунлаштуридиған бихәтәр җай изләватқанлиқини илгири сүргән америка һөкүмити, орунлаштурулидиған дөләтниң кишилик һоқуқ хатириси "пакиз болуши" ни тәләп қилмақта.

Хәвәрләргә қариғанда келәр ай явропа иттипақиниң юқири дәриҗилик бир вәкилләр өмики вашингтонни зиярәт қилип, гуәнтанамодики тутқунлар мәсилисини музакирә қилидикән.


Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт