Рабийә ханимниң қизи униңға вакалитән тәйвәндә өткүзүлидиған һөҗҗәтлик филим муһакимә йиғиниға қатнишиду

Дуня уйғур қурултийиниң рәиси рабийә қадир ханимниң қизи раһилә абдуреһим рабийә ханимға вакалитән 18 - июлдин 21 - июлғичә тәйвәнни зиярәт қилип, тәйбей, гавшюң қатарлиқ шәһәрләрдә өткүзүлидиған "муһәббәтниң 10 шәрти" намлиқ һөҗҗәтлик филим һәққидики сөһбәт йиғиниға қатнишиду. Мәзкур паалийәт тәйвәндики кишилик һоқуқ тәшкилати тәрипидин уюштурулған.
Мухбиримиз әркин
2010.07.16

Мәзкур паалийәтни уюштурған кишилик һоқуқ тәшкилати "йөҗәнхуй" ниң ашкарилишичә, сөһбәт йиғини уйғурларниң үрүмчи 5 - июл қаршилиқ һәрикитиниң бир йиллиқи вә рабийә ханим һәққидики "муһәббәтниң 10 шәрти" намлиқ һөҗҗәтлик филимниң тәйвәндә рәсмий базарға селинғанлиқи мунасивити билән чақирилған.

Бу, тәйвәндики кишилик һоқуқ тәшкилатлириниң рабийә ханимни тунҗи қетим тәйвәнгә тәклип қилиши әмәс. Улар бурун рабийә ханимни бир қанчә қетим тәйвәнгә тәклип қилған болсиму, лекин һакимийәт бешидики гоминдаң һөкүмити рабийә ханимға виза беришни рәт қилип, у, дуня уйғур қурултийи билән болған мунасивитини үзсә, виза беришни ойлишидиғанлиқини билдүргән иди.

Хәвәрләрдә әскәртишичә, раһилә ханим 19 - числа тәйбейдә мухбирларни күтүвелиш йиғини өткүзидикән һәм тәйвәндики кишилик һоқуқ тәшкилатлири билән учришидикән. Өткән йили тәйвән гавшюң хәлқара кино фестивали "муһәббәтниң 10 шәрти"ни феситивалға қатнаштуруп,бейҗиң даирилириниң наразилиқиға учриған иди.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.