200 Din artuq kishilik hoquq orgini xitay we rusiyini süriye mesiliside eyiblidi

Mezkur bayanat süriyidiki hökümetke qarshi heriketler bashlan'ghanliqigha del bir yil tolghanliqi munasiwiti bilen élan qilin'ghan. Bayanatta süriye xelqining basturushlargha berdashliq bérip, qarshiliqlirini dawamlashturuwatqanliqigha apirin oqulush bilen birge, bu jeryanda yüzlerche kichik balini öz ichige alghan jem'iy 8000 kishining xelq'araning tedbirsizliki sewebidin bihude ölüp ketkenliki eskertildi.

Yuqiridiki kishilik hoquq we yardem teshkilatliri xitay we rusiyini esed hökümitining zalimliqini ayaghlashturush üchün bashqa döletler bilen maslishishqa chaqirdi.

B b s ning bayan qilishiche, süriye armiyisi xelqqe qarshi élip bériwatqan qoralliq heriketlirini dawam qilip, türkiyining chégrasigha yéqin jaydiki idip shehirini qolgha alghan. Nöwette ularning isyan heriketliri bashlan'ghan derra shehirige yürüsh qilghanliqi melum. Bu sewebtin süriyilikler hazir öylirini tashlap, jénini élip qéchishqa bashlighan bolup, bügün türkiye tashqi ishlar ministirliqi 24 sa'et ichidila mingdin artuq panahlan'ghuchining türkiyige kirgenlikini jakarlidi. Hazirghiche türkiyige qachqan süriyilik panahlan'ghuchilarning sani 14700 ge yetken. Panahliq tiligüchilerning ichide süriye armiyisining 7 généralimu bar.