Xitay re'isi xu jintaw xongkong ziyaritining tunji küni qarshiliq namayishigha duch keldi

Xu jintaw xongkong xitaygha qayturulghanliqining 15 yilliqini xatirilesh üchün xongkonggha kelgen we xongkongda ziyarette boluwatqan idi.

U shenbe küni xongkongdiki bir yéngi yasalghan porttda ziyarette boluwatqanda bir nechche muxbir 89 - yilidiki “Tyen'emén oqughuchilar herikiti” ning herbiy küch ishlitip basturulghanliqi heqqide so'allarni sorighan.

Ularning arisida xongkong “Alma géziti” ning muxbiri xong yüting awazni bekrek kötürüp so'allarni warqirap sorighanliqi uchun bixeterlik xadimliri uni 15 minut tutup turup qoyuwetken. Xong yüting xu jintawdin: xu re'isi siz xongkong xelqining “4 - Iyun weqesi” üstidin chiqirilghan hökümni aghdurushni telep qilidighanliqini anglidingizmu? dep sorighan.

U so'alini yene tekrarlap: zadi anglidingizmu yoq? dep warqirighan.

Bu so'alni yene bashqa töt muxbirmu sorighan bolup ulargha saqchilar tegmigen. Halbuki xu bu so'allargha inkas qayturmighan.

Uning bu so'allarni anglighan - anglimighanliqi yaki qesten qulaq yopuruwalghan melum emes iken.

Xuning xongkong ziyariti dawam qiliwatqan peytlerde yene bir qisim namayishchilar naraziliq namayishi ötküzüp xongkonggha toluq démokratiye telep qilghan we namayishni bésiqturushqa kelgen saqchila bilen toqunushqan. Saqchilar namayishchilargha much gazi pürküp ularni tarqaqlashturghan.

En'giliye 1997 - yili 1 - iyul xongkongni xitay kommunistlirigha ötküzüp bergen we shundin kéyin xongkongning démokratik hawasi bara - bara nacharliship xongkongluqlarning naraziliqini qozghighan.