Xitay türmisidiki kanada puqrasi hüseyin jélil ötken jüme küni anisi bilen körüshtürülgen

Xitay hökümiti, muddetsiz qamaq jazasigha höküm qilin'ghan kanada puqrasi hüseyin jélilning yéqinda anisi bilen jaza mudditini ötewatqan ürümchidiki türmide körüshüshige yene bir qétim ruxset qilghan.
Muxbirimiz erkin
2009-04-15
Share

Kanada "yer shari we pochta" gézitining aldinqi küni élan qilghan bu heqtiki xewirige qarighanda körüshüsh ötken jüme küni élip bérilghan bolup, türmining yoqlighuchilar bilen mehbuslarni ayrip turidighan eyneklik qobulxanisidiki körüshüshte ana- bala 25 minut etrapida söhbetleshken.

Kanadadiki weqedin xewerdar Uyghur pa'aliyetchiliridin muhemmet toxti ependining "yer shari we pochta" gézitige eskertishiche, "hüseyin jélil hazirgha qeder türmidiki yalghuz kishilik qarangghu kamirda tutup turulmaqta" iken. U, salametlik ehwalidin shikayet qilip, éghir qorsaq aghriqi sewebi köp qétim doxturgha körünüshni telep qilghan bolsimu, lékin türme da'irilirining iltimasigha pisent qilmighanliqini bildürgen. Hüseyin jélil 2006 ‏- yili 3 ‏- ayda özbékistanda qolgha élinip uzun ötmey xitaygha ötküzüp bérilgen idi.
 
Xitay hökümiti kanada da'irilirining qarshi turushigha qarimay hüseyin jélilni " térrorchiliq" bilen eyibligen. Uning kanada wetendashliqini ret qilip, ötken yili muddetsiz qamaq jazasigha höküm qilghan idi. Lékin kanada hökümiti hüseyin jélilning " térrorchiliq" qilghanliqini ispatlaydighan pakit yoqliqini ilgiri sürgen. Hüseyin jélil bolsa pütün iqrarnamisining ten jazasi astida élin'ghanliqini bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet