Xitay da'iriliri qeshqer “Yéngi bazar weqesi” ge chétilip tutush buyruqi chiqirilghan ikki Uyghur yashni étiwetkenlikini bildürdi

Xitay saqchi da'iriliri muhemmet ili tiliwaldi we tursun hesenning 30-we 31-iyul künliri yüz bergen qeshqer “Yéngi bazar weqesi” bilen chétishliqi barliqini ilgiri sürüp, Uyghur jengchilirini tutup bergenlerge 100 ming yüendin mukapat béridighanliqini élan qilghan idi.

Xitayning Uyghur aptonom rayonidiki hökümet bayanatchisi xu xenmin düshenbe küni qeshqerde muxbirlargha ashkarilap, muhemmet ili tiliwaldi we tursun hesenning xitay amanliq küchliri teripidin qeshqer sheher sirtidiki bir shalliqtiki toqunushta étip öltürülgenlikini bildürgen.

Xitay da'iriliri buningdin sel burun qeshqer yéngi bazardiki weqede  ölgenlerning 18 kishige yetkenlikini élan qilip, weqeni “Chékidin ashqan diniy esebiy küchler” ning peyda qilghanliqini we hujumchilarning rehbirining “Sherqiy türkistan islam herikiti” bilen alaqisi  barliqini ilgiri sürgen. Biraq d u q rehbiri rabiye qadir xanim weqeni xitay hökümitining siyasiti keltürüp chiqarghanliqini ilgiri sürdi.

U, hujumchilarni eyibke buyruyalmaydighanliqini eskertip, “Weqede yüz bergen her ikkila tereptiki ölüm-yitimge xitay hökümiti jawabkar bolushi kérek” dep körsetti. Qeshqerdin kelgen xewerlerdin melum bolushiche, xitay da'iriliri weqedin kéyin toqunush yüz bergen kochini taqap, kimlik tekshürüshke bashlighan.