G-8 döletliri intérnét erkinlikini muzakire qilmaqchi

Bularning ichide gogul, féyisbuk we mikrosoft shirketlirining bashliqlirimu bar.

B b s ning xewer qilishiche, mezkur yighinda intérnét erkinliki, intérnétning qanchilik erkin bolushi kérekliki we uning hökümetlerning kontrolluqidin xaliy bolush mesilisige oxshash mesililer muzakire qilinidiken. Yighin axirida chiqqan netije aldimizdiki hepte g-8 döletliri uchrishishida otturigha qoyulidiken.

Igilinishiche, bu, g-8 döletlirining tunji qétim intérnétni talash-tartish qilishi bolup, yighinda intérnétning hökümet kontrolluqidin xaliy bolushi we intérnéttiki chékidin ashqan erkinlikni tertipke sélishtin ibaret ikki ana témining asasiy muzakire témisi bolidighanliqi texmin qilinmaqta.

B b s da éytilishiche, amérika qoshma shtatliri intérnét erkinlikining döletning iqtisadiy we tashqi siyasiti üchün muhimliqini ilgirimu tekitlep kelgen.
Emma buning bilen birlikte intérnétta neshr hoquqi we kishilerning shexsi hayat mexpiyetlikining depsende qilinish ehwalining mewjutluqimu bir heqiqet bolup, yawropa elliride buninggha qarshi sadalar barghanséri kücheymekte.

Yéqindin buyan meydan'gha kéliwatqan intérnétqa munasiwetlik weqeler, bolupmu ottura sherq we shimaliy afriqa döletliride meydan'gha kelgen démokratik heriketlerde intérnétning alahide zor rol oynishi g-8 döletlirini bu heqte muzakire élip bérishqa ündigen amil hésablinidiken.

2009-Yili ürümchide yüz bergen ürümchi weqesidimu intérnét muhim rol oynighan. Weqedin kéyin xitay da'iriliri Uyghur rayonida intérnétni bir yilgha yéqin tosuwetken idi. Yéqindin buyan xitay hökümitining yasimen güli herikiti seweblik intérnéttiki bésimni hessilep ashurushimu dunya axbarat wasitiliride ghulghula yaratqan idi.