Amérika mudapi'e ministiri lé'on panétta xitay rehberlirini xakkirliq hujumliri mesilisi üstide söhbet qilishqa chaqirdi

U shi jinping we bashqa xitay rehberlirini amérika bilen mezkur mesilide di'alog ötküzüshke chaqirghan.

Hazir, xitaydin kéliwatqan xakkirliq hujumlirining sani barghanséri éship bériwatqan bolup, ular asasliq amérikining néfit, tebi'iy gaz we bashqa énérgiye shirketlirini nishan qilghan iken.

Amérika da'iriliri xakkirliq hujumliri mesiliside xitayni köp qétim agahlandurghan bolsimu, emma xitay buning özliri bilen alaqisi yoqluqini ilgiri sürüp kelgen idi.

Amérikining wirjiniye shtatidiki mandiyat intérnét bixeterliki shirkiti mes'ulining birleshme agéntliqigha bildürüshiche, amérikining diplomatik chaqiriqlirining eksiche, xitayning xakkirliq hujum istratégiyisi we téxnikisi téximu murekkepliship ketken bolup, bu hujumlar peqet sistémilar ichige suqunup kirip, jasusluq qilishnila emes, belki pütkül uchur sistémisini weyran qilishni meqset qilghan iken.

Li'on panétta xakkirliq hujum mesilisini otturigha qoyghanda, xitay terep mesilige köngül bölidighanliqini éytqan bolsimu, emma bir resmiy kélishim hasil qilinmighan.

Amérika mudapi'e ministiri lé'on panétta peyshenbe küni xitaydiki resmiy ziyaritini ayaghlashturdi.