Islam kerimofning qizi dadisining “Diktator” emeslikini aqlap sotqa erzi qildi

Perghane uchur torining xewer qilishiche, özbékistanning b d t pen-ma'arip orginida turushluq da'imiy wekili lola kerimowaning dewa qilishiche, mezkur tor bet élan qilghan maqalide “Diktatorning qizliri” dégen atalghu ishlitilgen.

Kerimofning qizi bu maqalide éytilghan kerimofning qizliri-acha-singillarning bir ataqliq artistqa pul bérip özlirining féstiwalgha qatnishish salahiyitige érishkenliki heqqidiki uchurningmu töhmet ikenlikini körsetken. Biraq, ularning erzi asasliqi islam kerimofni “Diktator” dep atashqa qaritilghan.

2010-Yili, 20-mayda “89Ru'e” torida fransiyilik aptor awgustin skalbérning kerimof we ularning qizliri heqqide bir parche maqalisi élan qilin'ghan idi.

Kerimofning qizi lola kerimowa maqalidiki “Diktatorning qizliri” dégen ibarini asas qilip, sotqa erz sunup, 30 ming yawro tölem töleshni telep qilghan.

Amérika awazining yézishiche, chégrasiz muxbirlar teshkilati bu heqte pikir bayan qilip, kerimofning diktatoriliq teripini körsetken.

Mezkur tor betmu kerimofning qilmishlirining diktatoriliq ikenlikining alliqachan dunya teripidin étirap qilinip bolun'ghanliqini tekitligen. Biraq sot yenila dawamlashmaqta iken.
Islam kerimof chong qizi gülnare kerimowani bir mezgil özbékistanning moskwadiki elchisi qilip teyinligen, kichik qizi lola kerimowa bolsa yillardin buyan özbékistanning b d t pen –ma'arip orginidiki wekili bolup kelmekte.

Buningdin bir qanche yil ilgiri stalinning newrisimu moskwadiki bir gézit üstidin bowisi stalinni “Diktatoriliq” bilen qarilighanliq üchün sotqa erz sunup axiri meghlup bolghan idi.